Vawiin khan Lawngtlai DC Conference Hall ah Kuthnathawktute Ni 2015 chu hman a ni a, LADC CEM Pu V. Zirsanga leh Lawngtlai Bawrhsap Pu J. Hmingthanmawia chu khuallian an ni.

Khuallian Pu J. Hmingthanmawia chuan Kuthnathawktute hi kan ramah a tam zawk kan nih avangin anni tih hmasawn hi ram hmasawnna tling a ni a, chuvang chuan sawrkar pawhin a ngai pawimawha NLUP hmangin chawikan a tum hle ani. Lawngtlai District ah ringawt pawh NLUP hi chhungkaw 12,222 hnenah sem an ni tawh ani a ti. NLUP tluka retheite chawikan tumna Policy tha hi India ramah hian a la awm lo tih theih a ni a, 100% Subsidy, rulhlet ngai miahlo a ni a, a dawngtuten tihhlawhtlin theuh hi kan ba a ni a ti.

Khuallian CEM Pu V. Zirsanga pawhin Lawngtlai District mipuite chu eiraltu nilova thawkchhuaktu nih zawk tum thar theuh turin a fuih a, hnam dingchhuak tur, ram mite chunga leng ni tur chuan thawkchhuaktu kan nih ngei a ngai a ni. Mi taima, thawhchhuah tum tak tak tan chuan kawng zau taka hawnin a awm renga, hmanrua pawh hi kan nei tha tawh hle, kei ngei pawhin vawiin thleng hian leilet ka la siam a, nikum pawh khan buh tin 640 zet ka la thar ve thei a ni a ti.

Kuthnathawktute Ni ah hian NLUP Vety Department hnuaia chhungkaw 75 te hnenah Instalment hnuhnung ber sem nghal a ni a, khuallian pahnihte hian chhungkaw 5 ve ve hnenah an sem hmasa nghe nghe ani. Vawiina NLUP sem hi vawk vulh thlangtute hnena sem niin Vawk chaw leina tur, Bungbel leina tur leh tui dahkhawlna atana hman tur Rs. 10,550.00 theuh pek an ni.

Kuthnathawktute Ni District NLUP Implementing Board bul tuma neih a ni a, Lawngtlai SDO Sadaar, Pu Lallawmawma, MCS, NLUP Nodal Officer in kaihruaiin, Lai Idol 2014 Nula Linda Lalchhanhimi’n NLUP hla, Lawngtlai DVO Dr. Lalnunhlima Ralte phuah sa in kalkhawmte zaiin a awi bawk.