Mamit June 13th 2018 Vawiin khan NLUP Kutpui Fair Cum Exibition chu Mamitah hman a ni a. Pu JH Rothuama, MLA Chairman, NLUP Implementing Board chuan vawiin khan Chhimveng YMA Hall-ah khuallian niin Kut hawnna a nei. 

Pu JH Rothuama chuan NLUP Kutpui hmang tura kalkhawm zawng zawngte chungah lawmthu a sawi a. NLUP kutpui chu District hrang hrangah hlawhtling taka kalpui a ni tawh a, NLUP hmanga mi harsa zawkte'n lei rem an rahna tura tanpuina hna kalpuina kum 8 lai mai liam ta a, a hlawhtlinna phochhuah chu NLUP Kutpuiin a tum a nih thu a sawi. Mizoram sawkar flagship Programme NLUP chu sawiselna leh hlawhtling lova sawi awm thin mahse chhungkaw tam tak chuan a hlawhtlinna an tel chho mek zel a, he schemes kalpui anih atanga ti tha duh leh duh lote chu dinhmun inthlau tak takah kan awm tawh a ni a ti.

Khuallian chuan NLUP hmanga mi harsa zawkte tanpuina chuan chhungkaw tinah hmasawnna hmel hmuh theiha a lan avangin India ram State zinga mimal sum lakluh Per Capita Income chu a sang ber a ni a ti a. Hei vang hian Prime Minister pawhin India rama state dangte pawhin an hman ve a duh thu hial a sawi a ni tiin tunah hian State thenkhatte chuan hman ve an tum mek a ni a ti.

Pu JH Rothuama chuan NLUP hmanga Mizoram sawrkarin hma a lakna hian a tum ber pakhat chu kan ramngaw kan vah chereu leh ram leilung kan tichereu a, ramsa humhalhna tura eizawnna ngialnghet din hi a ni a ti a. NLUP hmanga tanpuina chu Bank Account kaltlang veka tanpuina dawngtute'n pawisa an dawn avangin bo thlau emaw pek kim loh emaw a awm thei lo a ni a ti bawk.

He hun khualzahawm ni-a hmanpuitu Pu James Lalrinchhana, Secretary, NLUP Implementing Board chuan thusawina nei bawkin Mizoram Sawrkar Flagship Programme   NLUP chu Ni 14 January, 2010 atang khan kalpui tan a nih thu leh he hmalakna kaltlanga Mizorama chhungkaw tinte leh rampum huap anga hmasawnna kan neih hrang hrangte a tarlang bawk a ni.

Pu Bhupesh Chaudhary Deputy Commissioner, Mamit chuan inkhawm hi kaihruaiin inlawmna thu a sawi bawk a ni. 

NLUP Line Department hrang hrangte'n an hmalakna an phochhuahna hmun Mamit Bazar venga Bazar shed a mi chu khuallian hian a hawng nghal a, he hmunah hian NLUP Line Department hrang hrangte chuan an tharchhuah leh siamchhuahte phochhuahna neiin mipuite tan man tlawm zawka lei theihin chhawpchhuah a ni a. NLUP Line Department hrang hrang Environment & Forest, AH &Vety, Horticulture, Agriculture, Sericulture, Soil & Water Conservation, Industries leh Fisheries te bakah E- Distric, Health Department atangin zunthlum leh thisensang  test-na  National Programme for Prevention and Control of Cancer, Diabeties, Cardiovascular Diseases & Stroke NPCDCS & te leh  NationalTobacco Control Programme NTCP te chuan chuap hrisel leh sel loh a hmunah hian mipui an en nghal a ni, DIPRO te chuan Photo Exibition bakah NLUP hlawhtlinpuitute hlimthla Projector hmangin a lem nen mipuite hmuh theihin an hmalakna an phochhuak a, a vaiin Stall hi 27 luahkhah niin a nikhatna a tangin mipui thahnem takin an tlawh nghal a ni. 

Pu JH Rothuama, MLA , Chairman NLUP Implementing Board te nupa hian vawiin vek khan DC Complex ah thing an phun a ni.

Pu JH Rothuama hi a nupui Pi Denghmingliani, Pu James Lalrinchhana, Secretary, NLUP Implementing Board, Pu Zoremthara, Deputy Secretary NIB,  Pu Andrew Lalremruata, NIB Media Officer bakah Official eng emaw zatin an tawiawm a ni.

Attachment

• Loading attachment...