Vawiin khan PHQ, Khatla-ah Home Minister Pu R. Lalzirliana’n  Hmar Peoples' Convention (Democratic) HPC (D) te hnenah chhawmdawlna a hlan.

Home Minister chuan thu sawiin HPC ‘D’ mi leh sa, Mizorama rawn kir te chu sawrkarin a ngai pawimawh em em a ni tiin sawrkarin chhawmdawlna pek a tiam chu a hlen chhuak dawn a ni, a ti a. Hnam khat vek kan ni tih hre reng tur leh Mizorama remna leh muanna a awm zel theih nan thahnemngai taka sawrkar nena tangrual turin a chah a. Inremna thuthlungin a ken tel pakhat Sinlung Hills Development Council á¹­hiata thuneihna sang zawk nei Sinlung Hills Council (SHC) din chungchang pawh June Ni 27 Assembly Session-a rel a nih tur thu a sawi a. Chhawmdawlna chu tangkai taka hmang turin a chah bawk a ni.

April Ni 2, 2018 khan State Guest House-ah Mizoram sawrkar leh Hmar Peoples' Convention (Democratic) te chuan inremna thuthlung an ziak a. Inremnaah hian Mizoram sawrkar aiawhin Chief secretary Pu Arvind Ray leh HPC (D) aiawhin an Chairman Pu H Zosangbera ten hming an ziak a ni. Vawiin hian mi 100 bawr vel hnenah chhawmdawlna hlan a ni a. Cheng nuai 3 theuh pek niin CTI, Sesawnga HPC (D) ten an ralthuamte Mizoram sawrkar hnena an hlan khan cheng 20,000 pek an lo ni tawh a, a bak zawng pek leh an ni.

Programme hi Home Addl. Secretary Pu Lalbiakzama chuan a kaihruai a. Home Minister chuan chhawmdawlna a hlan a. IGP Pu LH Shanliana, IPS chuan lawmthu sawina in hun a khar a. Home Department hotute leh hnathawkte an tel a ni.