Nimin khan Lunglei District Disaster Management Authority Chairman Lunglei DC Dr Ankita Chakravarty, IAS hovin a office chamber-ah Lunglei District huamchhunga Disaster Management kalpui zel dan tur sawihona meeting neih a ni. He meeting ah hian a kaihhnawih sawrkar Department hotute, tlawmngai pawl aiawhte leh BSF, Assam Rifles, Lunglei District Adventure Club hruaitute an tel.

Dr Ankita Chakravarty chuan June ni 4 zana Lunglawn Venga leimin nasa tak avanga chhiatna rapthlak thleng chu pawi a tih thu leh chhiat tawk chhungkuate a tawrhpui thu a sawi a. Chhiatna thlen thu hriat a nih veleh Department hrang hrang, tlawmngai pawl te, Lunglei District Adventure Club, 1^st Battalion Assam Rifles leh khawtlang hruaitu ten chhanchhuah hna hi a rang thei ang berin an thawk nghal a ni tiin an thahnemngaihna leh inpekna avangin an chungah lawmthu a sawi a. Tun hnaiah ruahsur leh thli tleh avangin Lunglei District hmun hrang hrangah harsatna thlenin - in chhia, kawngpui min, leimin in kawngpui a hnawhte leh luilian in chenna hmunhma a chim mek te a awm nual a ni tiin chhiatrupna lo thlen thulha chetlak dan tur mumal taka kan ruahman fel a, thawhhona tha tak nen kan kalpui a tul a ni, a ti.

Meeting-ah hian kan chunga thleng thei reng chhiatrupna lo hmachhawn dan tur leh mi mangang, tanpui ngaite leh chhanchhuah ngaite puih dan tur uluk taka sawiho niin chhiatrupna thlena information inpek chhuah dan tur te, District Emergency Operation Center (DEOC) changtlung zawk neih dan tur te, Command System mumal tak ruahman dan te, hmanraw neih sa leh mamawhte, inbiakpawhna wireless system tha tak neih dan tur te leh pawimawh dang te sawiho a ni a. Department tinah Disaster Management chungchang buaipui tur Nodal Officer ruat theuh turin rawtna siam a ni a. Lunglei khawpui leh a chhehvel ah leimin hlauhawmna hmun te tlawha ‘risk assessment’ nei turin Lunglei DC chuan engineer rual te a ruat bawk.