Vawiin khan Minister of State Pu Lal Thanzara’n Mizoram Class II Contractors’ Association inkhawmpui ‘Special General Assembly’ chu Aijal Club-ah a hmanpui. He hun hi Pu K. Sawmvela. Chief Engineer(Road) PWD pawhin a telpui a ni. Special General Assembly hi an pawl President Pu K. Lungruala chuan kaihruaiin Upa F. Vanlalsiama’n hunserh a hmang a, an pawl General Secretary Pu Lalhmingliana hnen atangin report ngaihthlak a ni bawk.
Pu Lal Thanzara chuan Mizoramin hmun dang angin industry te a neih ve loh vangte leh politics boruak avangte in party worker tam tak te hian contract hna an beisei leh an thawh te hi a loh theih lohna laite a awm thin a. PWD hnuaia contractor in ziak lut te chu mi nazawng an hming hawhtir lo tura chahin hna an hmuh te hralh emaw, insem emaw mai lovin mahni ngeiin thawk thei tura inbuatsaih leh inpuahchah thin turin a fuih bawk.
CPWD Manual hnuaia contractor-te inziahluh dan chu hman mai tura peihfel thawh khat anih thusawiin Pu Lal Thanzara chuan an hna hmuh ang ang te chu ram tana rohlu an siam ani tih hre reng chunga tha taka thawk thin turin a chah bakah an hnathawh te chu an damlai lungphun anih tih te hre reng turin a hrilh bawk. PWD kalphung a tha sawt hle chu lawmawm tiin Minister chuan a hna viltu thenkhatten an beisei loh tur an beisei thin te hi a vanduaithlak a, hengte hi Sawrkar anga hriat a nih chuan Sawrkar chuan a en liam mai mai dawn lo a ni, a ti.
Minister chuan PWD hnuaia hmalakna hrang hrang te, JNNURM hnuaia Aizawl khawpui chhunga kawngpui chei(black topping) hna kalpui mekte leh State Plan Road hnuaia hmalakna hrang hrang tlangpuite tarlangin heng hmalakna te hi chhan engemaw vanga khaihlak a ni a, pawl thenkhat ten Sawrkar an vau mai thin te hi a vanduaithlak a, hei hi a Mizo lovin a Kristian lo hle a ni, a ti bawk.
He hun hmanpuitu dang Pu K. Sawmvela Chief Engineer(Roads) pawhin thusawiin contractor te chu an hna hlep atanga car man to te lei mai lova contract hna ah an hlawkpui tur leh nakina zelah an hna lama pui thei tur bungrua leh khawl te leia an mahni contract thawk thei zel tura inpuahchah leh in ‘professionalize’ turin a fuih a ni.
Tun hnai khan Sawrkar Laipui chuan Mizorama lamlian pahnih – Lunglei to Tlabung Road leh Seling to Champhai Road te chu National Highway ah a puang a. World Bank Project II hnuaia hmalakna tur thenkhat – Champhai to Zokhawthar kawng leh Chumkhum to Chawngte kawngte chu tender a ni tawh in tender endik mek a ni a, hun reilo tea a thawktu tur thlanfel beisei a ni. Asian Development Bank hnuai Serchhip – Thenzawl – Buarpui kawng sial hna pawh tihfel mek a ni.
Chawhnu lamah rorel inkhawm an hmang nghal a ni.
