Mizoram Youth Commission leh Labour Employment & Industrial Training Department buatsaih, ni hnih awh tur, Mizoram Skill Fest 2014 chu vawiin khan Assembly House Annexe Building-ah Home Minister Pu Lalzirliana’n a hawng.
Pu R. Lalzirliana chuan Skill Fest hmangtute chu tumruhna, insumtheihna, tawrhchhelna nen mahni hma a thil awmte tawn ngam turin a chah a. Tunlai khawvelah chhawrtlak leh hmantlak thiamna neih a tul tawh a, Degree sang tak neih ringawt piah lamah khawvelin eng thiamna nge a mamawh tih ngaihtuah reng chunga in zir a tul takzet a ni, a ti a. Skill Fest kaltlanga Vocational Training Providers (VTP) hrang hrang lokalte chu Mizo thalai te’n tangkai taka an chhawr ngei a beisei thu a sawi a ni.
Labour, Employment & Industrial Training Minister Pu Lalrinmawia Ralte pawhin thalaite fuihna thu sawiin hlawhtling tur chuan hrehawm hmasak a ngai a, hrehawm hmasak huam lo tan hlawhtlinna a awm loh thu leh Mizo thalai hetiang tuarchhuak peihte chuan dinhmun tha an luah thin thu a sawi a. Skill Fest hmang tura lokal VTP te chungah lawmthu hrilhin Mizo thalaite chu tih takzet leh hmangaihna thinlung nena enkawl turin a chah a ni.
Hawnna inkhawm kaihruaitu Pu T. Sangkunga, MLA, Chairman, Mizoram Youth Commission chuan Mizoram Skill Fest, 2014 lo chhuah dan sawiin India ramin hna thawk thiam mamawh tam hle mahse duh ang tawk Skilled Worker an awm loh dan te, ram chhung hmun hrang hranga neih thin Skill Fest pawh hei vanga rawt chhuah a nih dan a tarlang a. Skill Fest hmang tura thalai kalkhawm te chu he hun hi hlawk taka hmang turin duhsakna a hlan a ni.
Skill Fest, 2014 hi thalaiten an hlut hle a, Aizawl khaw pawn atang pawhin mi engemawzat in an chhim a, vawiin hian tlawhtu mi 3000 chuang zet an kal a ni. Vocational Training Providers (VTP) hi ram chhung hmun hrang hrang atangin 22 an lokal a, Skill Fest hi naktuk tlaiah khar a ni ang.
