"Pi leh pu te sawidanin chhimlamah thluak a awm a, hmar lamah sum a awm an ti thin a, vawiinah chuan chu 'thluak' chu khawiahnge a awm tak, i pawt let ang u." - Pu Joseph Lalhimpuia

Parliamentary Secretary i/c School Education Pu Joseph Lalhimpuia chu vawiin khan Lunglei lo lutin, Tourist Lodge-ah Education Department officials leh staff ten amah hmuahna leh lawmna hun an hmang a ni.

Parliamentary Secretary Pu Joseph Lalhimpuia chuan vawiin chawhnu vek dar 2:00 khan Lunglei Govt. Higher Secondary School a tlawh a; Govt.HSS Hall-ah School Principal, zirtirtu, staff leh zirlai ten amah lawmna inkhawm an buatsaih sak a ni. Lunglei Govt.HSS Principal Pu K.Vanlalroluahtuma kaihhruai inkhawmah hian Pu Joseph Lalhimpuia chuan amah lawmna leh chawimawina hun an buatsaih chungah thinlung takin lawmthu a sawi a. Zirlai kalkhawmte fuihin Pu Joseph Lalhimpuia chuan harsatna tam tak paltlanga zirna sualchhuah hian mihring a siam puilting thin a, harsatna chuan hlawhtlinna a pe thin bawk a ni, a ti. Lunglei pawn atanga sikul kalte tan khum 100 awm theihna Hostel sak a nih tur thu leh rualbanlote tan wheelchair-a innawrna tur 'ramp' siam a nih tur thu a sawi a. SSA Pipe Band intuaitharna tur sorkarin a tum sak ang, a ti bawk. Pu Joseph Lalhimpuia chuan Govt.HSS tanpui nan Rs.10,000 a pe bawk a ni.

Govt HSS thawktuten mamawh leh harsatna a hnena an thlente chu Parliamenetary Secretary chuan bawhzui a tum tur thu a hrilh a.

Vawiina Govt.HSS a tlawhnaah hian Pu Joseph Lalhimpuia hi Education Department Jt. Director Pu JH Biakmawia-in a tawiawm a ni.