Vawiin chawhma dar 10:00 khan DC Conference Hall, Serchhip-ah 26 Serchhip leh 27 Tuikum Assembly Constituency chhunga Booth Level Officer (BLO) te tan training neih a ni a, Election Officer Pu Lalhmansanga MCS, AERO 27-Tuikum, Pu Vanlalrova MCS leh AERO 26-Serchhip Pi B. Malsawmtluangi MCS ten zirtirna an pe a ni.

He training hi District Election Officer leh District Bawrhsap ni bawk Pi Juhi Mukherjee, IAS chuan a hawng a, hawnna thutawi sawiin BLO te chu ECI hmanraw pawimawh, a bul thuma hna pawimawh tak thawktute an nih avangin an hnathawh chu a pawimawh em em a ni tiin dik leh fimkhur taka thawk turin a chah a ni.

He hunah hian Pi Teresy Vanlalhruaii MCS, Training Observer leh Project Director DRDA ni bawk pawhin thu a sawi a, BLO te chu ECI hmanraw pawimawh, mipui hne hnai bertu an nih avangin anmahni bial chhung hre chiang turin a fuih a, an hna thawh turte pawh uluk leh fimkhur taka thawk tura chahin, hriatthiam loh leh harsatna an neih chang pawh a hotute rawn hreh lo turin a chah bawk a ni.

BLO ten training an neih zawh hnu hian, an hriat thiam leh thiam loh te inenlet leh nan Evaluation/test an nei thlap a ni. Tin, Serchhip District chhunga Assembly Constituency pakhat dang, 28 Hrangturzo biala BLO te tan pawh hetiang training hi tun thla ni 23 khan an lo buatsaih tawh bawk a ni.