Rilru lama rualbanlote infiamna hrang hrang hmanga tanpuitu ‘Special Olympics’ chuan Mizorama hmalakna kal zelah Spastic Society of Mizoram buatsaihin naupang rualbanlote tan vawiin khan Electric Veng YMA Hall-ah ‘Special Olympics: Bharat’ hnuaia ruahmanna pakhat ‘Healthy Athlete: Special Smiles Program’ huaihawt a ni a. He hun hi Health Minister Pu Lal Thanzara’n a hmanpui a ni.
Minister Pu Lal Thanzara chuan rilru lama rualbanlo naupangte chuan talent hrang hrang malsawmna an dawng a: anmahni enkawl a, chung an thiamna hailang a chawisang tura thawktute inpekna chu lawmawm a tih thu sawiin, society lama hruaitute leh nu leh pa leh zirtirtute bakah vawiin programme-a tlawmngaia lo kal doctor-te chungah lawmthu a sawi a. Special Olympics: Bharat hnuaiah hian Mizoram aiawhin inelna hrang hrangah Mizo naupang an lo kal thin tawh thu leh, mi tam zawk an la kal zel a beisei thu Minister chuan a sawi a. Hrisel leh hlim taka rualbanlo naupangte an awm theih chu heng hmalakna ten a tum ber a nih thu a sawi bawk.
Special Smiles Program hmanna hun hi Gilead Special School Pricipal Pi Laldinpuii’n kaihruaiin, naupang engemawzat ha endik sak an ni a. Ha enkawl dan turte zirtir niin, toothbrush leh toothpaste-te pek an ni bawk. He programme hmang tur hian Dr. Swarga Jyoti Das, Special Smiles Clinical Director a lo kal a; a ni bakah hian Mizo dentist engemawzatin naupangte ha hi an endik sak bawk a ni.
Special Olympic: Bharat hnuaiah hian rilru lama rualbanlo naupangte mamawh hrang hrang tur ruahman sak thin niin, heng hmang hian infiamna chi hrang hrang khel thei turin hmalak thin a ni a. Mizo naupangte pawh state hrang hrangah an lo kal tawh thin a. Amaherawhchu India chhung leh ram pawna heng inelna chi hrang hranga tel tur hian ‘Disability Certificate”, doctor-in a sign ngei a ngai thin a. Mizo rualbanlo naupang zingah heng certificate neilo an la awm nual avangin inelnaa tel theihloh phah an awm fo thin a ni.
