Vawiin chawhma dar 11:00 khan AMFU Hall, Kolasib-ah District Agriculture Officer Pu R. Lalnunzira kaihhruainain NLUP 2nd Phase dawngtu mi 85 te hnenah 2nd installment sem a ni a. Heng chhungkuate hi leilet (WRC-II) leh oil palm chingtute an ni.

He inkhawma khuallian Kolasib DC Pu. Jitender Yadav, IAS chuan, ‘Kolasib-a thlaichingtute hian theih tawp in chhuah chuan Kolasib District atang hian agriculture revolution kan thlen thei a. Oil Palm District atana sawrkarin min puang hi a lawmawm a, rim taka kan thawh chuan oil palm ringawt pawh hi chungkaw tam tak tan nakin thlenga nun khawnawmna tur a ni dawn a ni’ tiin NLUP dawngtute a fuih.

Pu Lalfela Sailo, Addl. DC pawhin thuchah sawiin, ‘Sawrkarin miretheite dinchhuahna turin NLUP a duang a; hnathawktute leh sum leh pai tam tak a hmang a, a tihhlawhtlin ngei hi kan bat a ni’ a ti a. Kolasib District bikah phei chuan oil palm herna khawl lian tak, kan tharchhuah apiang hralh theih nghalna hmun sawrkarin min ruahmansak avangin kan vannei hle a ni, a ti.

Vawiin NLUP tanpuina dawngtute hi Pu Lalengliana SMS (AGRO) leh Pi Zohmingmawii AEO (OP) ten leilet enkawl dan leh oil palm enkawl dan chipchiar takin an zirtir a. Kolasib DIPRO leh media Officer (NLUP) Pu Robert Thangmawia pawhin kalkhawmte fuihna thuchah a sawi bawk.