Vawiin chawhnu dar 2:00 khan Serchhip District Addl. DC Pu VL Remliana, MCS kaihruaiin Serchhip District Level Fire Prevention Committee chu DC meeting roomah an ṭhukhawm a, January ni 19-24, 2015 a “Ramkang Ven Hapta” (Fire Prevention Week) hman dan tur an ngaihtuah a ni.

Ruahman dan chuan January ni 19, 2015 chawhma dar 11:00 ah Serchhip Bazar Kawnah “Ramkang Ven Hapta, 2015” hawnna in khawm neih tum a ni a, khuallian atan Pi Lalawmpuii Chawngthu, MLA beisei a ni. Hemi rual hian North Vanlaiphai Sub-Division leh Thenzawl Sub-Division ah te hman bawk tur a ni a, SDO(C) leh DFO te ruahmanna lo siam tura tih an ni a, District chhunga Zirna In zawng zawngah Zirlaiten ram tikang lo tura intiamna an sawi rual bawk ang.

Tlangau leh YMA Information Centre kaltlangin ram tikang lo tura mipuite ngenna bakah, ram kang ven pawimawhzia leh meilam sial chungchangte puan tura ruahmanna siam anih bakah Kohhran zawng zawngah Kohhran inkhawma chhiarchhuah turin ngenna siam ani bawk ang a, Banner leh poster thahnem tak tar ani bawk ang. Tualchhung chanchinbu leh Cable Network ah te a tul anga Advertisement tihchhuah tura rel anih bakah YMA Chanchinbu kaltlanga mipuite hnena ngenna siam ani bawk ang. Hei bakah hian District Bawrhsap in Ram tikang lo tura mipuite hriattirna/khapna (Prohibitory Order) a chhuah bawk ang.

District chhunga ram kang ven kawnga hna thawk tha khua panga thlanchhuah a ni dawn a, a thlangtu tur committee din nghal ani bawk. Hei bakah hian Tualchhung chanchinbute zingah ram kang ven lam hawi zirtirna pet ha pathum thlanchhuah tur niin DIPRO, Serchhip kaihhruaina hnuaiah endiktu committee din a ni bawk