Mizoram sawrkar ruahman angin vawiin chawhma dar 11:00 khan Serchhip DC Conference Hall-ah “Kuthnathawktute Ni” hman a ni a, State Planning Board Vice Chairman Pu H.Liansailova chuan khuallian niin he hun hi a hmanpui. He hunah hian NLUP Second Phase beneficiary thenkhatte hnenah tanpuina tangkafai sem a ni a, Serchhip-a Sawrkar Gazetted Officer te, Tlawmngai Pawl, District-Level NLUP Committee, Khawtlang leh Kohhran hruaitute bakah Kuthnathawktute he hun hmang tur hian an kal tha hle a ni.

Khuallian Pu H.Liansailova chuan kalkhawm te hma a thusawiin Mizoram Sawrkarin kuthnathawktute pawimawhna leh harsatna an tawh te a hriatchian em avangin an dinhmun sawhngheh a eizawnna ngialnghet an neih theihna kawng dap chu a thupui ber a ni a ti a, Mizoram Chief minister Pu Lal Thanhawla thil vei ber anih bawk avangin kuthnathawktute dinhmun chawisan kawngah tha a thlah duh lova, a hun hnuhnung lamah pawh beidang duh lovin hma a la reng a, a rah kan hmu tan ta ani a ti bawk. Kuthnathawktute ngaihpawimawhna ram apiangin hma an sawn a, tunhnaia a zinchhuahna ah kuthnathawktute hmalakna hnuhma thar hmuhnawm tak tak a hmuh thu te sawiin Sawrkar hnathawkte, Tlawmngai Pawl hrang hrangte leh mipui leh khawtlang hruaitute thawhhona that vang liau liau ani tih a hriat thu a sawi bawk.

Pu Liansailova chuan NLUP hian ei leh bar intodelhnate, ramngaw leh tuihna humhalhte, sik leh sa tlachhe tur venhim te, mihring khawsakna ngialnghet neihte a ken tel vek avanginj ngaihthah mai mai chi a ni lova, politics a inchirhthehna atana hman leh sawihmawm ani thin hi chu hriatchianloh vang anih a rin thu a sawi a, NLUP avanga Mizoram sawrkar sum harsat phah leh, Sawrkar Department thenkhat te sum hman tur pawh hek anih vanga sum harsatna awm ta anga sawi ani thin chu dawt anih thu a hrechiangtu berte zing ami anih thu a sawi a, Sawrkar Department thenkhata hnathawk hlawh leh mamawh dang atan NLUP sum chu hman hawh anih zawk thin a ni tiin sawrkar Officer te zingah dikhlel deuha tawngkam thlah an awm thin chu pawi a tih thu a sawi bawk. NLUP 3rd leh 4th Phase beneficiary te tanpuina sum dawn tur pawh kum kalta khan peihfel vek anih tawh thu leh sawrkar Laipui atanga pekchhuah tura ruahman anih mek laia diklo taka hektu an awm avanga tun thlenga harsatna awm phah ta anih thu leh sukiang tura theihtawp an chhuah mek thu a sawi bawk.

Khuallian hian NLUP Sericulture leh A.H. & Vety hnuaia NLUP Second Phase beneficiary thlanchhuah bik panga v eve hnenah NLUP final installment a sem a, Sericulture Department hnuai ami te hian Rs. 18,024/- theuh an dawng a, A.H. & Vety Department hnuai ami te hian Rs. 20,550/- theuh an dawng bawk a ni.

Vawiin “Kuthnathawktute Ni” pual inkhawm hi Pu V.L.Remliana,MCS Addl. DC in a kaihruai a, Pu Lawmkima, MCS, NLUP Nodal Officer, Serchhip in Report tawi pe in, AMFU leh aiawhin Pu R.Lalhlimpuia, Sr. Vice-President, Serchhip District in thusawina hun an hmang a, Pu V. Zothansanga, DSO in lawmthu sawina hun hmangin a tin a ni.

Attachment

  • Loading attachment...