Vawiin chawhma dar 11:00 khan Serchhip DC Conference Hall-ah National Voters’ Day vawi 5-na hman a ni a, Serchhip District Election Officer, Bawrhsap ni bawk Pi Juhi Mukherjee IAS chuan khuallian niin a hmanpui a ni.

National Voters’ Day puala mipui kalkhawmte chibai a buk hnuah voters, Electorall Roll a awm tharte chu lawmpuina thu hlanin Pi Juhi chuan India ram Danpuiin mipuitling china a ngaih an nih avangin ramchhung inrelbawlna ah chanvo a pe a, an mawhphurhnate dik tak leh huaisen taka hlen zel turin a fuih a, inthlanna dik leh felfai tak nei turin mawhphurhna leh tihtur pawimawh tak an nei ani tih hre reng turin a chah a ni. Kumin National Voters’ Day thupui “Easy Registration, Easy Correction” tih anih ang ngeiin awlsam zawka registration tih leh siamthat anih theih nan hma an la mek a ni a ti a, Serchhip mipui za a 62.1 (62.1%) chu vote nei an nih thu leh heihi Mizoram pumpui atanga teh pawh a a san thu sawiin thil lawmawm tak a ni a ti a, nikum MP inthlan ah pawh Mizoram pum a vote tlak thatna ber District an nih thu sawiin kan hma lawka Village Council inthlan lo awm turah pawh vote thlak vek turin vote nei zawng zawng te a sawm a ni.

Vawiin inkhawmah hian kum kalta chhunga Serchhip District a Assembly Constituency pathuma BLO hna thawk tha ber thlanchhuah te hnenah lawmman Citation leh Tangkafai Rs. 3000/- theuh hlan an ni a, chung BLO tha thlanchhuah te chu :

26-Serchhip(ST) A/C : Pu C.V.L. Hruaia, BLO, Serchhip-VIII Polling Station

27-Tuikum (ST) A/C : Pu Lianmawia, BLO, Baktawng-I Polling Station

28-Hrangturzo (ST) A/C :Pu R.C. Laldailova, BLO, Keitum-II Polling Station

BLO tha lawmman leh Polling Station titha lawmman hi District Election Officer Pi Juhi Mukherjee, IAS in a hlan a ni.

Pu Lalhmansanga, MCS, Election Officer pawhin National Voters’ Day hman anih chhan leh a awmzia te sawifiahna hun a hmang a, Electoral Roll a awm chu vote thlak thei an ni ta tih entirna ani satliah mai lova, Dan hmangin India ram rorelna leh inrelbawlna ah an tel ve tawh tihna ani tih hre turin leh rilru diktak pu chunga an mawhphurhna te hlen ngei turin a chah a ni.

Vawiin inkhawm hi Pu V.L.Remliana, MCS, Addl. D.C. Serchhip-in a kaihruai a, Electoral Roll a tel thar te zing ami Tv. K. Lalnunfela, Serchhip P&E Veng kaihhruaiin National Voters’ Day thutiam chham rual a ni a, Pu Vanlalrova, MCS, AERO, Tuikum (ST) A/C leh Pi B.Malsawmtluangi, MCS, AERO, Serchhip (ST) A/C ten Voters Electoral Roll a thun thar te hnenah EPIC an sem a ni.

National Voters’ Day hi January ni 25 a hman tur a ni a, Mizoramah erawh he ni hi Pathianni anih vangin Election Commission of India phalna in vawiin hian hman a ni.