Urban Development & Poverty Alleviation Department  hnuaia Integrated Housing & Slum Development Programme (IHSDP) kaltlanga Rs. 30,10,000 /- senga sak Chhiahtlang Community Centre, Chhiahtlang Chanmari Veng ami chu Health & Family Welfare Minister Pu Lal Thanzara’n vawiin chawhma dar 11:00 khan a hawng.

Chhiahtlang Community Centre hawnna inkhawmah khuallian Pu Lal Thanzara chuan thu sawiin tuna kan rama hmasawnna chi hrang hrang lo thleng te hi Chanchin Tha kawltu hnam kan nih vang a ni a, Pathian hnena thinlung taka lawmthu sawi hi kan tih ngei ngei tur a ni tiin lawm nachang hre turin Chhiahtlang mipui kalkhawmte a chah a, Chhiahtlang khawtlangin an duhsakna leh an lo dawnsawn danah lawmthu a sawi bawk a ni. UD&PA Department hmalakna hrang hrangte fakin Minister chuan a enkawl Department te pawhin UD&PA Department kaltlangin hmasawnna hna tam tak an thawk a ni a ti a, hmasawnna hnathawh kawngah an Sawrkar chuan khairual a tum avangin Opposition Bial an enhran ngailoh thu leh Ruling Bial nen angkhat renga an ngaihven thu a sawi a ni. Chhiahtlangah pawh ITI leh Polytechnic sak anih tur thu leh a sakna tur sum pawh a awm tawh thu a sawi bawk a ni.

Chhiahtlang Community Centre hi February ni 27, 2014 atanga sak tan niin September ni 8, 2014 ah sak zawh a ni a, a dung feet 62, a vang feet 30 a ni a, feet 16 a sang a ni bawk. Zunram thiarna pahnih leh ek in pahnih a awm a, a satu contractor hi Pu C. Lalrawna, Chhiahtlang a ni.

Vawiin Community Centre hawnna inkhawm hi Pu Zorammuana, MCS, Director, UD&PA in a kaihruai a, District Bawrhsap Pi Juhi Mukherjee, IAS chu Khualzahawm a ni a, Pu J. Laldingliana, AE, UD&PA in Technical Report a pe a, Pu ST Lalhmingmawia, Sanitation Officer in lawmthu sawiin hun a khar a ni.