Vawiin khan Higher Secondary School Lecturers' Association of Mizoram (HISSLAM) chuan Tourist Lodge, Chaltlang-ah General Conference vawi 13-na an hmang a, Parliamentary Secretary to CM Pu Lal Thanzara'n a hmanpui. Conference hawnna inkhawm hi HISSLAM Vice-President Pu PC Thanghranga'n a kaihruai a, HISSLAM President Pu Lalchhuankima'n Presidential Address a sawi bawk.
Conference hmanpuitu Parliamentary Secretary Pu Lal Thanzara chuan zirtirtu te chuan sikulah mai ni lovin pawn lamah pawh an nihna an lantir tur a ni, a ti. Zirlaite nunah +2 hi hun pawimawh em em, puitling nun intan hun a nih avangin zirtirtute pawhin mawhphurhna sang leh zual an nei a. Zirlaite nun siam, kawng kawhhmuh leh puitling tura buatsaih hun a ni a, damchhung nghawng thei hun a nih avangin fimkhur leh uluk taka he huna zirlaite enkawl a tul a ni, a ti. HISSLAM-in an service hmakhua atana ngenna an siam chhangin Parliamentary Secretary chuan Selection Grade siam sak tum a nih thu leh Gazetted dinhmuna hlankai pawh a dil dangte nen uluk taka enfiah mek a ni, a ti bawk.
Vawiin Conference-ah hian thurel tur chhawpchhuah langsar zingah - 1) 3 tier Pay Scale siam sak rawtna te, 2). Adhoc Recurring Grant-in-Aid Rules leh Provincialisation Rules for HSS siam rawntna leh 3). HSS Lecturer te tan Gazetted dinhmun dil ni rawh se tih te a ni a. Kum 2011-2013 chhunga an pawl hruaitu tur MJA kaihhruainain chawhnu lamah inthlanna neih a ni a, HISSLAM hruaitu thar te chu :
President - Vanlalzuata, MICE HSS
Vice President - Lalliantluanga, Govt. Zemabawk HSS
General Secretary - Lalchhuanmawia, Govt. Republic HSS
Asst. GS - V. Vungliana, Govt. JL HSS
Treasurer - John Zoliana, Govt. Central HSS
Financial Secy. - Lianduna, Govt. Mizo HSS te an ni.
