Education Minister Pu Lalsawta chu tunlai hian New Delhi-ah committee pawimawh tak 3-a tel tur leh School leh Higher & Technical Education chungchang thil pawimawh ngaihtuah leh bawhzui turin a thang mek.
Ni 30.5.2011 khan National Vocational Qualification Framework (NVWF) - eizawnna hawi zawnga lehkha zirna - ngaihtuahna State Education Minister 12-te meeting-ah a tel a. June ni 8 khian hemi chungchang bawk zau zawka ngaihtuah turin India rampum Education Minister meeting-ah a tel leh ang. Ni 31.5.2011 khan Ministry of DoNER-ah kalin Mizoram College te tan Development Fund dil mek te bawhzui leh Mizorama IAS Coaching Academy hawng tura dilna theln mek te chu DoNER Ministry hotute a sawipui. Ni 1.6.2011 zanah Mizoram House-ah Delhi Mizo Zirlai Pawl (DMZP) hruaitute nen inkawmhona neiin zirna chungchanga hmasawnna tur thil tam tan an sawihova, Minister hian zanriah a kilpui nghal bawk a ni.
Ni 2.6.2011-ah Ministry of Health & Family Welfare tlawhin MBBS/BDS leh Medical Course dangah seat tam zawk Mizoram tan Central Pool Quota atanga pe turin a ngen a. RIMS, Imphal-a MBBS seat 3, OBC Reservation pek avanga Mizoram-in a chan tak te, NEIGRIHMS, Shillong-ah seat 3 aia tam dil belh te, MAMC, New Delhi-a seat 1 paihsak tawh hmuhlet leh dan tur te a thlen a. Ministry of Health & Family Welfare chuan a thu tlen te hi lo ngaihtuah sak an tum thu an lo hrilh a ni. Heng bakah hian Pu Lalsawta chuan Vardhaman Mahavir Medical College & Hospital, New Delhi-ah leh Rajiv Gandhi Cancer Institute, New Delhi-ah te pawh seat pe turin a thlen bawk.
Education Minister hian New Delhi-a a cham chhung hian NCERT hmun te tlawhin Primary, Upper Primary leh Secondary School-a Science leh Maths subject-a 'Learning Kits' zirlaite tana tangkai leh tuina pe thei zawnga zirna hmanrua te a en a, Mizoram school-a hman ve a that dan tur leh a remchan dan tur te a sawipui a ni.
Vawiin pawh khan Ministry of Human Resource Development chu Mizoram tan Technical Seat tam zawk dil belh chungchangah a tlawh a. June ni 7 & 8 khian Central Advisory Board on Education (CABE) meeting-ah Education Ministers' Meeting on NVQEF leh RTE Act chungchangah a tel leh dawn a ni.
