Vawiin khan Kawnpui Green Hills High School ah Kawnpui Youth Association buatsaihin  Zirlai Pass thar te chawimawina neih a ni a; he hun hi  Pu Hmingdailova Khiangte, Mizoram Youth Commission Chairman -in a hmanpui.

Thusawiin Pu Hmingdailova Khiangte chuan Sawrkar hnasang thawk tur Mizo zingah kan tlem tial tial a; Central Service Exam-ah pawh Mizoram atangin kumin ah tling kan awm lo a; Zirlaite an thanharh loh chuan Mizoram chu Hnamdang Officer lian te kaihhruaina hnuai-ah kan la awm thuai ang a; chu chuan kan khawtlang nun leh Kristianna ah rah duhawmlo a chhuah thei ang a ti a. Zirlai te chuan an thil hriat leh tui zawng chu belhchian tlak leh ram tana chhawr tlakin an hmang tur a ni a ti. Chhiarpui hnuhnung berah Mizoram chu Literacy percentage ah 2 na atangin 3 na ah kan tla thla dawn a ni a ti bawk. HSLC Result 2011 chungchang sawiin Youth Commission Chairman chuan Sawrkar High School te chu sum tam tak sengin Sawrkar in a enkawl a; thahnemngai leh taima lehzuala heng kan vanneihna tehi kan hman a ngai a ni a ti a. Private school aia result tha neih hi Sawrkar chuan a beisei em em a ni a ti.

Thusawitu dang Dr HL Malsawma Director Higher & Techinical Education pawhin College kal tum zirlai seat changlo awm teuh chu Zirlai Pawl ten an manganpui a, mahse Aizawl ah chauh nilo, Aizawl College lian ah chauh nilo, College tha tak tak-ah seat tam tak a la awm a ni a ti.

Vawiina Zirlai titha chawimawina hi Kawnpui Youth Association buatsaih a ni a; HSLC leh a chunglam Exam hnuhnung bera passed thar mi 116 hnenah chawimawina thuziak an hlan. Heng mite hi HSLC passed mi 50; HSSLC Passed mi 44; Degree Course ah mi 18; Master Degree ah mi 4 an ni.

Vawiin vek khan Tuirial Bialtu MLA Pu Hmingdailova Khiangte chuan Lungdai ah Rural Housing Programme hnuaia mirethei In saknan chhungkaw 8 hnenah Rangva 4 bundle theuh a sem nghal a; tihian Tuirial Bial chhunga chhungkaw 65 hnenah Rangva  sem a ni ta a ni.