Chief Minister Pu Lal Thanhawla chuan 'Vohbik naupangte hi Pathian ropuina a lanna tura siam an ni' a ti. He thu hi Gilead Special School for Spastics  building thar, Falkland, Zemabawka vawiina a hawnnaa a sawi a ni a. Vohbik naupang a tihte hi pianphunga rualbanlo,spastics naupangte an ni.

Chief Minister chuan spastics naupangte hi abik taka enkawl ngai an ni tih central sorkar pawhin hriain, hemi atan hian Commissioner post pawh sorkar chu siam tura tih anih thu a sawi a.Amaherawhchu sum lam harsatna avangin hmalak a chak thei lo a ni a ti a. Mizoram sorkar chu sum dehchhuah lama pachhe tak, hmarchhak state te zingah ringawt pawh thawk chhuak chhe lawt lak anih thu a sawi a.Heng vohbik naupangte enkawl tur hian nu leh pa te aia enkawl dan hre zawk leh thiam zawk tam tak Pathianin a pe a, chuvangin lawmthu sawi tur kan ni a ti.

Pu Hawla chuan school thar chu a panna a harsat avang leh awmna a hlat tak deuh avanga bus an dil chu dilna mangkhawng rit tak ani chungin zawi zawia ngaihtuah an ni ang a ti a, in nawr chi erawh a ni lovang a ti. Nu leh Pa te chu heng vohbik naupangte hi vanduainaah ngai lova, malsawmna an ni zawk tih pawm thiam tura chahin, Pathian malsawmna dil chung zelin duhsakna a hlan a ni.

Spastics naupangte leh school te hi Spastics Society of Mizoram enkawl an ni a.He school thar hmun hi a neitu Pu Sangsiama'n phal taka a hman hawh tir an ni a. A school building sak nan hian sorkar atanga cheng nuai 10 an hmuh atangte, Pu Lalduhthlana,IFS hmalaknaa India ram aiawha Hongkonga a awm chhunga Mizo awm ve te nena an thawkhawm cheng nuai 10 leh Society in an neihsa cheng nuai 5, avaia cheng nuai 25 senga an sak a ni a. School bulhnai maiah hian in luah hawhin naupang 30 chuang awmna hostel a awm bawk a ni. He school thar an neih hma hian mi in luahin kum 22 chhung zet an lo awm kual tawh thin a ni.

Hawnna inkhawm hi Pi Zokhumi Vankung, President, Spastics Society of Mizoramin a kaihhruai a, Chief Minister hi a nupui Pi Lal Riliani bakah Pu R.Lalrinawma, bialtu MLA in an tawiawm a ni.