May ni 9-13, 2011 chhunga neih tur 14th Mizoram Official Taekwondo Championship chu vawiin khan Ramhlun Sporting Club Field, Ramhlun North-ah Agriculture Minister leh Bialtu MLA ni bawk Pu H.Liansailova'n a hawng. Championship hawnna inkhawm hi Organising Chairman Dr. Robert Rualthankhuma'n a kaihruai a ni.

Khuallian chuan ram changkang apiangah infiamna a changkangin an ngaisang thin a, chuvangin hmasawnna leh infiamna lam hi a inkungkaih tlat a ni, a ti. Mizoram sorkar pawhin sports lam ngai pawimawhin infiammite mamawh phuhruk turin tan a la chho zel a, infiammite mawhphurhna ve thung chu inpekna leh tihtakzetna thinlung neih a, ram tan hmingthatna hawn leh hmasawnna tura ke pen a ni, a ti bawk. Mizoten Taekwondo kan hmelhriatna la rei loh ngaihtuahin hruaitute leh player-te inpekna zarah a lar chho ta viau a, state pawna inelna hrang hrangah pawh Mizoram chawimawitute anni avangin lawmawm a tih thu a sawi a. State pum huapa hetiang inelna thianghlim leh tha tak an buatsaih chu a vanneihthlak a ni tiin a duhsakna sang ber a hlan bawk a ni.

Mizoram Amateur Taekwondo Association (MATA) President Dr. Rualkhuma Colney pawhin thu sawiin Championship duhawm tak buatsaih nana tha leh zung seng zawng zawngte chungah lawmthu a sawi a. Infiammite hlawhtlinna bul ber chu mahni inthununna hi a ni, a ti bawk.

Vawiina tan tak 14th Mizoram Official Taekwondo Championship hi MATA leh Ramhlun Sporting Club tangduna huaihawt a ni a. He Championship-ah hian District 7 atangin Team 19 zet an tel a. Player Mipa 218 leh Hmeichhia 103 (an vaiin 327) niin Category hrang hrangah Bout 268 neih a ni dawn a ni. Tun Championship-ah hian Lawmmawn hrang hrang ruahman a ni a, chungte chu - Team Champion, Runners-Up Team, Best Fighting Spirit Team, Most Promising Team, Best Discipline Team, Best Fighter (Mipa & Hmeichhia) leh Champion of Champions te a ni.

MATA hi kum 1989 khan din tan a ni a, President hmasa ber chu Pu Laltlankima niin hemi kum vek hian State Level Championship hmasa ber buatsaih nghal a ni. Tuna hian member 13,027 an tling tawh a, chung zingah chuan Life Member 1720, Black Belt 76 leh Black Belt result nghak mek mi 20 an awm a. MATA hnuaiah hian Club 96 awmin International Refree 3, National Refree 17, State Refree 165 an nei bawk a ni.