Vawiin chawhma khan Higher and Techincal Education changtu Parliamentary Secretary, Pu H. Zothangliana chuan ni hnih awh tur 15^th EDU-OPTIONS 2017, Millenium Centre Roof Top-ah a hawng.

Pu H. Zothangliana chuan Edu-Options hian India ram mai ni lova ram pawn lam zirna thleng a huam chu lawmawm a tih thu sawiin fair chu zirlaite’n an tangkaipui ngei a beisei thu a sawi a. Zirna-in lo kal te chuan zirlaite tana an intiamna  ti hlawhtling ngei se a ti a. Zirlai, nu leh pa leh zirna-in te’n hmun leh hmuna indawrna an nei tur chu mitinin an hlawkpui ngei a beisei thu Parliamentary Secretary chuan a sawi a ni.   

He education fair hi Lynchpin leh Zalen chanchinbu tangkawp buatsaih a ni a. Stall 26 (zirna in-25 leh Bank-1) awmin hengte  hi India ram hmun hrang hrang atanga rawn kal an ni. He fair-ah hian counselling, career guidance, students’ loan bakah a hmunah admission tih theih nghal a ni a. Graduation leh Post Graduation course awmin stall hi field hrang hrang- Medical, engineering, law, science, journalism, management leh a dangte an ni.

He hawnna hi Pu Vanlalrema Vantawl chuan a kaihruai a. Parliamentary Secretary chuan stall hrang hrang te hi a tlawh zui nghal a. Fair hi Dar 11 a.m – 5 p.m chhunga hawn a ni.