1231/2026-2027

Dated Aizawl the 30th June, 2026 : Vawiin chawhnu khan Vigyan Bhawan, New Delhi ah - 16th Conference of the Central Council Health & Family Welfare neih a ni a.  He hunah hian Health Minister Pi Lalrinpuii pawhin thusawiin, hriselna lama Mizoram hmalakna hrang hrangte a tarlang a ni.

He meeting ah hian Pi Lalrinpuii chuan Mizoramin Sustainable Development Goals tihlawhtling tura a hmalakna kalzelah Neonatal Mortality rate leh under 5 Mortality rate pawh 9 leh 18 ve ve ah kan tlakthlak tawh thu te, Immunisation coverage pawh state data ang chuan 90% lai kan nih thu te,  non communicable disease chungchangah nasa taka inzirtirna leh damdawi semna kalpui a nih thu te, TB rinhlelhawm te X ray hmanga endik tam lamah pawh India ram pum huapa titha ber kan nih dan te, Quality service pekchhuahna tur kawngah pawh kan state chhunga health facilities 121 laiin NQAS certification an neih tawh thu te, Niti Ayog in tehna hrang hrang a siam hmanga Aspirational District te a endikna ah Health & Nutrition sector ah Mamit district chuan India ram puma titha 3 na a hauh dan te...Health Facilities zawng zawngah Ayushman Bharat Digital Mission hmalakna kalpui a niin, Urban Wellness Centre zawng zawngah esushrut clinic System hman vek a nih thute a sawi a.  Mi rethei zawkte tan chauha Central Sawrkar siam ABPMJAY chu convergence hlawhtling taka kalpuiin, Mizoram mipui zawng zawng huapa State Sawrkar in MUHCS hlawhtling taka a kalpui chhoh dan a tarlang bawk.

He hunah hian Union Health Minister JP Nadda pawhin thusawiin, tunhma lama damlo enkawlna - curative lam chauh ngaih pawimawh thin chu - Preventive, Curative , promotion, palliative leh rehabilitative lam kawnga Sawrkarin ke a pen tawh thu a sawi a.  India ram chuan independence a hmuh atanga Kum 100 na - kum 2047 ah chuan Developed Country a nih theihna turin Vikshit Bharat 2047 goal pawimawh tak a Siam a.  He goal hi mipui hriselte tello chuan tihhlawhtlin theih anih loh avangin mipuite hriselna hi Sawrkar chuan a ngaih pawimawh berte zing ami a nih reng tur thu a sawi. Health hi state subject a ni chungin Central Sawrkar leh State Sawrkar ten thawhhona thazawk an neih loh chuan hmasawnna a khairual theih loh thu a sawi a, Central Sawrkar in ruahmanna a siam hrang hrangte tihlawhtlingtu tak tak chu State Sawrkar te annih avangin theihtawp chhuaha India ram tana thawhho puiah Council member te a sawm bawk a ni.

Conference of the Central Council of Health & Family Welfare hi Union Health Minister kaihhruaina hnuaia State hrang hrang Health Minister te telna Council niin, Health lama India ram pum huap council  sang ber a ni a, India ram pum huapa hriselna lama hmalakna hrang hrangte thlir ho niin, hmasawnna tur kawng hrang hrangte an rel ho thin a ni.

He Council Meeting rual hian hriselna lama hmalakna atana tangkai hrang hrang -  National Ambulance Service Guidelines te, Suman Roadmap 2030 te, Samagra Shosu Bal Swasthya Karyakram  te, Anaemia Mukt Bharat Abhiyaan te bakah Ayushman Bharat Digital Mission hnuaia hmalakna hrang hrang - Aarogya Setu 2.0 te, Ayushman app te, Drug Registry te, Unified Health Interface te bakah Sushrut Lite te chu tlangzarh a ni nghal bawk.

He council meeting ah hian Union Health Secretary - JP Nadda, Union Minister of State - Anupriya Patel leh Prataprao Jadhav te bakah Niti Ayog member -  Dr M Srinivas te, State hrang hrang Health Minister leh Senior Officials te an tel tha hle a, Mizoram atang pawhin Dr Lily Chhakchhuak, Director, DHS te, Dr R. Lalchhuanawma, Mission Director, NHM te bakah Pu H. Lalhruaitluanga, Under Secretary ten Minister hi an tawiawm a ni.