1230/2026-2027 

Aizawl dated 29th June 2026: Directorate of School Education, Government of Mizoram chuan school naupang kum 5 leh kum 17 inkar tana Aadhaar enrolment ennawn leh siamthatna kalpui mek chungchangah a hnuai ami ang hian thuchhuah a siam.

PRESS STATEMENT

Unique Identification Authority of India (UIDAI) chuan state tinah Aadhaar enrolment hi hnapui bera neiin an kalpui thin a. Hemi hmalakna hi Mizoramah chuan General Administration Department (GAD) in a khaikhawm a. Aadhaar Enrolment hi tha tak leh huap zo taka a kal theih nan Department hrang hranga thuneitute - Women & Child Development Department, National Health Mission (NHM)/Health & Family Welfare Department, Deputy Commissioners, School Education Department, Bank & Public Sector Units, Post Office-a mi te chu Sub-Registrar ah ruat an ni a.

He hmalaknaah hian School Education Department chuan Samagra Shiksha hnuaia BRC leh CRCC staff thenkhat tlawmngaite hmangin Aadhaar Enrolment leh Mandatory Biometric Update (MBU) camp te a buatsaih thin a. Hlawh dang nei lova an kal chhuah thin avangin New Enrolment leh update-na atan per head-in UIDAI atangin lak phalna an nei thin a. Enrolment fee hi an ei leh in, vah velna leh lehkha etc. mamawh phuhrukna atan hmangin, Department-ah chhung lut tura phut an ni ngai lo.

Hetih mek lai hian UIDAI OM F.No.HQ-16033/1/2020-EU-I-HQ-Part (2) dated 19th September 2025 & F.No.HQ-16034/1/2021-EU-I-HQ (Part 1) dated 29th September 2025 chuan Aadhaar enrolment chungchangah naupang kum 5-17 chu kum khat chhung (October 2025 - October 2026) a thlawna Aadhaar enrolment leh update titurin thu chhuah a siam a, hemi thu bawhzui hian Directorate of School Education chuan a thlawna kalpui tawh tur a ni tih District tinte hnenah hriattirna a lo pe chhuak tawh bawk a (vide letter No.B.12011/2/2025-DSE(PM POSHAN) of 17th October 2025). Amaherawhchu, district thenkhatah UIDAI thu kalh a naupang enrolment leh update processing fee lo la an awm ni-a Consumer Union-in thu chhuah a siam hi School Education Department chuan pawi a ti hle a, hetianga fee lo la rute hi chhui mek an ni.

Aadhaar Enrolment tih thar leh Update hi tihmakmawh a nih avangin School Education Department chuan kalpui zel a tum a, hemi kawngah hian theihtawpa mi tinte tanpuina leh thawhpuina a ngen tak zet a ni.

Director of School Education

Mizoram, Aizawl