4461/2024-2025

Siaha the 27th February 2025: Vawiin chawhnu dar 1:30 khan KVK Training Hall, Siahatla, Siaha-ah Scientific Advisory Committee (SAC) Meeting vawi 16-na neih a ni a, Pi Ramdinliani IAS, Special Secretary, Agriculture & Farmers Welfare chuan video conference hmangin he hun hi a hmanpui.

Pi Ramdinliani chuan SAC meeting vawi 16na a kal member-te leh kuthnathawk (Farmers) te chu chibai bukin hun remchang hmasa berah KVK Siaha tlawh ngei a duh thu a sawi. KVK tangkaina tarlangin thlai chi tha bakah a chin dan tha leh hrisel ber te enchhinna nei a, mipui hman theih tura phochhuak thintu an ni a ti a, ropui a tih thu a sawi. Thlai thar chin tur enchhin (trial ) chu sum leh pai, hun leh tha tam tak sen ngai a ni a, KVK chuan hmun dang leh ram danga chin dan tha zawkte Siaha mipuite ban phakah a dah thin tiin a ropui takzet a ni, a ti.

Dr H Lalhmuliana, Sr Scientist & Head, KVK Siaha chuan kum 2024-25 chhunga KVK Siaha hmalaknate leh harsatna an neihte, achievement an neihte report pein kalkhawmte nen thil tul leh pawimawhte sawihona an nei nghal bawk. Discipline hrang hrang hnuaia Subject Matter Specialist (SMS) te chuan kum 2025-26 chhunga Annual action Plan tur presentation an pe a, committee chuan lungrual takin heng plan te hi an pawmpui vek a ni.

KVK Siaha hi Kum 2008 khan din a ni a, discipline hrang hrang awmin Horticulture, Agronomy, Plant Protection, Animal Science, Home Science leh Agricultiral Extension te a awm a ni. Administrative Building, Staff Quarters, Farmers Hostel, Demonstration Unit, Machinery House, Plant Based Laboratory te awmin tun dinhmunah staff 16 an awm mek. KVK Siaha chuan On Farm Trial (OFT), Frontline Demonstration (FLD), training, demonstration, diagnostic visits, field Day, Clinical Assistance, Exhibition/ Kisan Mela, Interaction, TV And radio talk, Soil testing, Mobile Advisory Services bakah scheme leh project hrang hrang; Doubling farmers income, Swachhta hi Sewa, Jal Shakti Abhiyan, distribution of leaflets/folders, NFSM, Integrated Pest Management (IPM), Skill Development for farmers, PKVY, STRY (Skill training for rural youth) etc te pawh a khawih tel bawk. Heng piah lamah hian thlai chi tha bik hrang hrangte KVK chuan farmer-te hnenah sem chhuakin a tiak sa te pawh a mamawh leh a tui tak tak mi te hnenah a pe chhuak thin bawk a ni.

Vawiin Meeting-ah hian Pi R. Lalramhluni, Joint Director (Crops), Pi Lalnunpuii Parte, Deputy Director (KVK), Department of Agriculture & Farmers Welfare leh Siaha District chhunga Department hrang hrang head of office- te leh KVK hnuaia farmer-te an tel bawk a ni.