4462/2024-2025

Dated Hnahthial, the 27th February, 2025: Hnahthial District Bawrhsap, Pi Rita Lalnunmawii Pachuau hovin National Highway- 54 kawng tla bal lai leh a hnuaia by-pass kawng siam lai mek endikna neih a ni a. Lei tla bal lai dawlna tur retaining wall leh by-pass kawng dinhmunte chu endik niin kawng siamtu, Mathiyan Construction Pvt. Ltd. te chuan retaining wall sak mek leh lei tla bal lai dawl hi thuneitute hnenah tun kum March ni 15 chhung hian an zawh fel hman tur thu an sawi a. Tun kum April thla chhung hian Hnahthial by-pass kawng chu siamfel a nih tur thu an sawi bawk a ni.

Bawrhsap, Pi Rita Lalnumawii Pachuau chu National Highway kawng siamtu, NHIDCL Manager, Aslam Sohail leh TKV Venkateswararao, Project Manager, Mathiyan Constuction Private Limited te chuan tawiawmin Highway dinhmun leh an zawhfel theih hun tura an beisei te chu an hrilh a. Bawrhsap chuan an hnathawhah duh aia hmasawnna hmuh tur a muan thu sawiin fur a thlen hma ngeiin kawng siam hna chu zo fel hman ngei ngei turin a hrilh a. NH-54 kawng khi laite enfiahin a zual zel loh nan hma la turin a hrilh bawk. Hei bakah hian kawng siamna bungrua an thiarna kawng- Haulawng road a rora leh mamawh dang an puhruna lamah kawng a lo chhiat palh pawn, a siam that hna an thawh leh ngeina turin NHIDCL leh Mathiyan Construction Pvt. Ltd. te chu Non-judicial Undertaking ziak turin a ti bawk.

Bawrhsap chuan Sub Headquarters YMA leh PWD-te chu Thawhtanni atang hian an highway kawng hnathawh chu uluk taka vil turin a chah nghal a ni.

NHIDCL Manager, Aslam Sohail chuan tun dinhmunah hian by-pass kawng hi za a sawmriat (80%) vel zawh fel a nih tawh thu sawiin tun April thla chhung ngei hian hna hi zawhfel a nih tur thu a sawi a ni.

By-pass kawng hi kum 2021 atanga thawh tan niin 6.9 km vela thui a ni a. Tun dinhmunah hian he kawng atan hian hnathawktu mi 65 an awm niin NHIDCL lam chuan an report a ni.

He kawng endiknaah hian Bawrhsap chu Addl SP, Pu Lalhmangaihhlua; Pu Zonghinga, SDPO ; Pu F.Lalrinfela, DIPRO; Er. Lalrinzuala, JE(PWD); MJA member-te leh Sub Headquarters YMA hruaitute chuan an tawiawm a ni.