4463/2024-2025

Champhai, 28th February 2025: Vawiin khan Champhai District Social Justice Assembly chu Pu Ngulzaṭhuama, SDO (Sadar) hovin DC Conference Hall, Keifangtlangah an ṭhukhawm a. Tunhnaia Social Audit Unit ten Integrated Rehabilitation Centre for Addicts (IRCA) - Reformation Center (Metakhen), Jail Veng leh Outreach and Drop in Centre (ODIC), Kahrawt an Audit-na thlirletin, hmalak zel dan tur te an sawiho a ni.

He hun kaihruaitu Pu Ngulzaṭhuama chuan Social Audit pawimawhna sawiin, hnathawk ṭha lo te pawn an thawh ṭhat phah ṭhinna leh hna ṭha zawk a awm theihna tura hmalakna pawimawh tak a ni, a ti a. He mi hnu hian Chairman in a sawm angin Pi PB Liansangpuii, Coordinator, Mizoram Social Justice & Rehabilitation Board (MSD&RB) chuan IRCA- Reformation Center (Metakhen), Jail Veng leh ODIC, Kahrawt dinhmun sawizauna hun a hmang a ni.

He hunah hian Social Audit Unit aṭangin Pu Benjamin Z Ralte, Social Audit Expert leh Pu H. Sangzela, District Resouce Person te chuan IRCA- Reformation Center (Metakhen) leh ODIC te an enfiahna aṭanga an thil hmuhchhuah hrang hrang te an sawi a. Inenkawlna kawngah te, thawktute inpekna te, center hmunhma, faina leh chaw ṭha inpek kawngah te IRCA- Reformation Center hnathawh chu fakawm an tih thu an sawi a. Center a lo changtlun zel nan Coordinator post ruak mek hnawhkhah te, tui lakna ṭha zawk ngaihtuah sak te, thiamna tihpunna (skill development) kawng ngaihtuah sak te leh an dikna chanvo an hriat theih nan a legal awareness neih te ṭul nia an hriat thu an tarlang bawk a ni.

He hunah hian sawrkar line department aiawhte bakah khawtlang hruaitu leh tlawmngai pawl - YMA, MHIP leh MUP aiawhte an tel a ni.