4464/2024-2025

Dated: Mamit the 28th of February, 2025 : Vawiin khan Darlak Teireiphai Oil Palms Farmer Cooperative Society LTD hnuaiah Ran chaw/Sangha chaw siamna leh hriak herna khawl chu mipuite hman theih turin Pu Malsawmzuala, Project Director (DRDO) Mamit District chuan a hawng.

Pu Malsawmzuala chuan Darlak khawtlang tana tangkai leh rotling tak tur khawl pawimawh hawn a ni ta chu lawmawm a tih thu a sawi a, mipui tana tangkai tak tur hawn a nih theih nana hmalatu zawng zawngte chungah lawmthu sawiin Darlak khawtlang te'n hmasawnna tha zawk an neih ngei nana tangkai taka hmang turin duhsakna a hlan a ni.

Pu Lalthangfala, District Cooperative Officer-in technical report a pek angin Darlak Teireiphai ran chaw siamna/Sangha chaw siamna/Oil Palm seeds, Hawirua/Chhawhchhi hriak herna khawl hi Rs. 20,00,000/- ( nuai sawmhnih) senga Cooperation Department-in kum 2023 a din a ni a, Nuai 20 atang hian khawl dahna tur In leh khawl hrang hrang Rajasthan, Gujarat leh Kolkotta atanga chah chhuah a ni. Tuna khawl hrang hrang awmte hi Ranchaw siamna khawl nikhata kg 1000 herchhuah theihna, Sangha chaw herna khawl nikhata kg 1000 herchhuah theihna, Chhawhchhi/Antam hriak herna khawl nikhata 40 litres herchhuah theihna, Oil Palm hriak herna khawl nikhata 100 litres herchhuah theihna khawlte a ni.

Vawiin a Ranchaw, Sangha chaw leh hriak herna khawl hawnna hun hi Pu Vanlalruata Pachuau, Vice President Darlak Teirei Phai Oil Palm Farmers Cooperative Society Ltd. chuan kaihruaiin Darlak Potencial Area te tana tangkai tak tur khawl tangkai tak tak hawn a nih theih nana hmalak saktu Cooperative Department-te chungah lawmthu a sawi a, Pu Vanlalfela, Secretary, Darlak Teireiphai Oil Palm Cooperative Society Ltd. pawhin lawmthu sawina neiin Darlak mipui te'n tangkai taka an hman ngei dawn thu a sawi bawk.