4465/2024-2025

Champhai, 28th February 2025: Vawiin khan Champhai District Level Narco Coordination Center (NCORD) Committee chu Bawrhsap Pu VL Remliana kaihhruaiin DC Conference Hall, Keifangtlangah an ṭhukhawm a. Ruihhlo dona kawnga sawrkar department leh tlawmngai pawl hrang hrang te hmalakna an thlirho a ni.

Ṭhutkhawm kaihruaitu Pu VL Remliana chuan kalkhawmte lawmna thu sawiin, ruihhlo chu tun kum zabi chhunga thil huatawm leh pawi ber nia a hriat thu a sawi a. “Kan thlah kal zel te tan khawvel ṭha zawk leh chenna tlak zawk kan siam theih nan ruihhlo do chu mut mawh hnar mawh a neih a ngai a ni,” a ti bawk.

Champhai SP Pu Shivendu Bhushan pawhin he hunah hian thu sawiin February 2025 chhungin Champhai District-ah ND&PS Act hnuaiah case 19 ziah luh niin, a kaihhnawihah mi 23 man an ni tih a tarlang a. February thla chhungin ruihhlo cheng vaibelchhe 25.71 (₹25,71,38,700) man hu Heroin kg 1.818, Methamphetamine kg 74.319 leh Crystal Methamphetamine kg 5.169 man a nih thu leh Champhai Bawrhsap Pu VL Remliana hovin February ni 19 khan vaibelchhe 61.68 man hu ruihhlo hal ral a ni tih a tarlang bawk.

Champhai Excise Department chuan February thla chhung hian Heroin gram 79, Opium gram 945 leh Methamphetamine kg 5.555 an man a, he mi kaihhnawihah hian case 6 ziak lutin mihring 12 an man tih he hunah hian tarlan a ni bawk.

He hunah hian NCORD hnuaia sawrkar department hrang hrang ten ruihhlo do kawnga an hmalakna te an sawiho a, thawhhona ṭha zawk neih dan tur te an sawiho bawk a ni.

Champhai District NCORD ṭhutkhawmah hian Health, Education, Social Welfare, Food & Drugs,  Excise, I&PR, Assam Rifles, Custom, Public Prosecutor leh Sub Hqrs YMA aiawhte an tel a ni.