4460/2024-2025

Saitual, the 27th February, 2025: Vawiin khan Union Minister of State for Road transport & Highways and Corporate Affairs Pu Harsh Malhotra chuan Saitual District a tlawh a, Saitual District-a office hotute, Village Council leh NGO hruaitute nen inkawmhona hun hmangin, Saituala District Hospital, Govt. High School leh Tamdil te a tlawh nghal a ni. Union Minister of State hi District Bawrhsap Dr. Lalngura Tlau bakah District chhunga officer te leh NHIDCL lama hotuten an lo dawngsawng a ni.  

Union Minister of State, Pu Harsh Malhotra hoin tukin dar 10:00 khan DC Conference hall Saitualah, Saitual District office hotute, VC leh NGO hruaitute nen inkawmhona hun hman a ni a, he hun hi District Bawrhsap Dr. Lalngura Tlau chuan a kai hruai. He hunah hian Saitual District-a Deputy Commissioner Office, District Rural Development Office, Public Works Department, Public Health Engineering Department leh District Education Office lama hotute chuan an department chungchang te, an hmalakna te leh central scheme an kalpui dan te chu PowerPoint Presentation hmangin an sawifiah a. Village Council leh NGO hruaitute pawhin Pu Harsh Malhotra hnenah an mamawh te an thlen a ni.  

He hunah hian Pu Harsh Malhotra chuan thu sawiin, Sawrkar laipui atanga Saitual District tlawh hmasa bertu a ni thei chu lawmawm a tih thu a sawi a, mipui tena tha taka an lo dawnsawnnaah lawmthu a sawi nghal bawk a ni. Union Minister of State chuan sawrkar laipui hmalakna (Central Scheme) hrang hrang a bikin, Mahatma Gandhi National Rural Employment Guarantee Act (MGNREGA), Pradhan Mantri Awas Yojana (PMAY), Jal Jeevan Mission (JJM) leh Mid-day Meal te chu Saitual District-a tha taka kalpui a ni chu lawmawm a tih thu a sawi a. Harsatna an tawh te ngaihthlakna hun tha a nei thei chu lawmawm a tih thu sawiin, Pu Harsh Malhotra chuan kalkhawmte chu an mamawh te ziaka thlen turin a chah a, a theih anga hma laksak a tum thu a sawi bawk.   

Officials te leh khawtlang hruaitute nen inkawmhona hun an hman zawh hian Pu Harsh Malhotra chuan Saitual District Hospital a tlawh a. OPD leh ward te fangin, hospital mamawh te enfiah a, he hunah hian Dr. Zothanpari Chhakchhuak, Sr. MO chuan a lo dawng sawng a ni. Hemi zawh hian Pu Harsh Malhotra chuan Saitual Govt. High School tlawhin, Netaji Subhash Chandra Bose Avasiya Vidyalaya (NSCBAV) hostel te, Vocational Educational building leh science lab te a fang a. He hunah hian Pu Micky R. Lalenkawla, DEO chuan a lo dawng sawng a ni. Union Minister of State chuan Tamdil tlawh lehin, Pi Zomuansangi, DFDO nen inkawmna hun an hmang a, sawrkar laipui scheme hnuaia Fisheries Department hnathawh hrang hrang te leh an ruahmanna te an sawi ho nghal a ni.   

Union Minister of State, Pu Harsh Malhotra chuan tlai dar 3:30 khan helicopter hmangin Saihmar helipad atangin Lengpui Airport a pan a, zaninah Aizawlah a riak ang a, naktukah Delhi a pan ang.