3229/2022-2023

Kolasib dated 12th January 2023: Vawiin chawhnu khan All Mizoram Karate Association Inter District Karate Championship 2022-23 kharna hun chu Pu John LT Sanga, Deputy Commissioner-in North Kolasib Games & Sports Semi Indoor Basketball Court, Hmar Veng, Kolasibah a hmanpui a. Maj. Carolyne Zonunmawii Pachuau, Chairman, Championship Organising Committee chuan hun a kaihruai a ni.

Khuallian Pu John LT Sanga, Deputy Commissioner, Kolasib chuan hriselna chu mihring thil neih hlu berte zing a mi a nih thu sawiin Karate chu hriselna kawng a hmasawnna thlen theitu, mahni inthununna kawng a min kaihruai theitu hmanraw țangkai a nih thu a sawi a. Karate hmang a inelna chu hriselna thlentu mai piah lam ah ram leh hnam tihmingțhatu ni tur a tihtakzetna nen hlawtlinna chang tur a bei turin Championship a telte chu a fuih. Pu John LT Sanga chuan mi hlawhtling ni tur chuan mahni hma hun thui tak thlir lawk thiam a țul thu sawiin Inter district championship a duhtawk mai lovin, National, International leh Olympic thleng a inel pha tur a tun atanga inpuahchah thiam turin kalkhawmte a chah a. Buaina leh harsatna hmachhawn inhuam chunga, beidawng lo a taima tak a beitute chu hlawhtlinna changtu an nih țhin thu sawiin chutiang tur chuan tumna nghet leh mumal tak neih a pawimawh thu a sawi bawk a ni.

Pu Zoremmawia Hlondo, Secretary, Organising Committee tarlan danin All Mizoram Karate Association buatsaih Mizoram pum huap Karate intihsiakna, Inter District Karate Championship vawi 17-na chu AMKA Kolasib chuan thlengin, ni 11-12 January 2023 khan NKGSA Semi Indoor Basketball Court, Kolasib Hmar vengah neih a ni.

He Championship hi Pu Lallawmawma, Addl. DC, Kolasib District chuan a hawng a, a hawnna inkhawm tawi neihah hian Pu Lalsiamliana Blackbelt sunna hun hman niin Championship neih dan report ngaihthlak a ni bawk. He Championship-ah hian Mizoram chhung district hrang hrang atangin Players leh Official te nen Karateka 170 vel an kalkhawm a ni.

17th Inter district Karate Championship 2022-23 ah hian Aizawl district chuan Gold medal 19 lain team Champion lawmman an la a, Kolasib hian lawmman pahnihna an la a ni. Champion of Champion lawmman mipa chu Lalrempuia, Aizawl district in lain hmeichhia ah C.Lalruatsangi, Champhai district in a la bawk a ni.