Nimin chawhnu khan 1^st Assam Rifles Commandant Col. B.B. Pun chuan 1^st Assam Rifles hmun, Lunglawnah tunhnaia Siaha District-a raltlante chungchangah Lunglei DIPRO leh chanchinbumite a kawm a ni.

Col. B.B. Pun chuan May 19-20, 2017 khan Myanmar rama Arakan state chhung, Ralie khua atangin raltlan mi 300 chuang te chuan hel pawl ‘Arakan Army’ an hlauh avanga Myanmar ramri depa khaw pahnih – Lungpuk leh Khaikhy khuaa an luh thu a sawi a. Raltlante dinhmun leh an hriselna enfiah tura Lunglei atanga Lt. Col. Vineet Kumar hova sipai leh doctor rual tirh an nih thu a sawi a ni.

Siaha District-a sawrkar hotute, Superintendent of Police, 1^st Assam Rifles, MADC sawrkar leh MTP te thawh hona tha avanga Ralie khuaa raltlante hruai let an ni chu lawmawm a tih thu a sawi a. Ralie khua VCP Pu Chebei ngeiin raltlante Myanmar ramria a lo hmuah thu a sawi a ni.  

Raltlante hi an vaiin mi 338 – Lungpukah mi 261 leh Khaikhyah mi 77 an ni a, a tam zawk chu hmeichhia leh naupang an ni. Nau pai lai mi 13 an tel bawk a ni.