Vawiin chawhma dar 10:30Am atanga tlailam dar 2:50Pm thleng khan DC's Conference Hall-ah  District Development Co-ordination & Monitoring Committee (DDCMC/ DISHA) meeting neih a ni a. Meeting hi  DDCMC Chairman Pu Ronald Sapa Tlau, Hon'ble MP (Rajya Sabha) in a kaihruai a, meeting-ah hian DDCMC member te an telkim hle a ni. 

Vawiin meeting-ah hian 2016-2017 Last Quarter (Jan' 2017-March' 2017) chhunga  Siaha District chhunga Centrally Sponsored Schemes (CSS) khawih Department ten an hmalakna leh an hmachhawp te thlir hova, huangzau taka sawiho a ni. Meeting-ah hian CSS hrang hrang heng : MGNEGS, IWMP, SPMRM, PMKSY, PMAY, NULM, BADP, DDAY, NHM, PMGSY, NRDWP,  DDUGJY,  NSAP, NLRMP, RMSA, SSA hnuaia hnathawh tawhna leh hmachhawp te thlir ho a ni. 

Pu Ronald Sapa Tlau chuan Siaha District in Prime Minister's Award for Excellence in Public Administration a dawng  chu  ropui a tih thu sawiin,  PM's Award dawng thei tura thahnem ngai taka hnathawktu Concerned Department te chungah lawmthu ka sawi tak zet a ni, a ti bawk. 

Vawiin DDCMC meeting chuan  hetiang hian "kan District in  PM's Award for Excellence in Public Administration kan dawn theih nana thawktu Concerned Department, a bik takin  DC,DHO,DRDA, DAO te DDCMC meeting hian kan lawmpuiin kan chhuang  hlawm hle a. He kan PM's Award kan dawn hian CSS hmanga mipui rawng kan bawlna kawngah  thahnem ngai lehzual theuh tur leh thawhhona tha zawk nei turin chona thar min pe rawh se." tiin Resolution  a passed bawk. 

Pu Ronald Sapa Tlau chuan DDCMC member te fuihin, Officer  an  post-na hmun apianga thahnem ngai taka hnathawk thin  leh an rawngbawl sak mipuite hmangaihna nena hnathawk thin chuan, an post-na hmun apiangah mipuiin an ngaina in, anni pawhin an post-na hmun apiangah nuam an ti thin.    Transfer Order nghak reng renga hun hmang  Officer chuan mahni a intihreawm mai mai bakah  mipui te hmangaihna nen rawngbawlsak a thei lo fo thin a, mipui sawisel an kai thuai thin.  Sawrkar laipui Sum (CSS) hmang hian in post-na hmun apiangah ram rotling siamin, in hming chher tum zel rawh u, a ti.