Nimin  khan Aizawl District Deputy Commissioner Pu Kannan Gopinathan kaihhruainain  D.C. Conference Hall-ah Aizawl District chhunga Damdawi in hrang hrangte Pre-Audit Fire Safety Report thlirhona leh Hospital Safety Sensitization Workshop neih a ni.

Pu Kannan Gopinathan chuan intawhkhawmna neih hmasakah khan Aizawl District chhunga damdawi in hrang hrangte kangmei chhuah thulha an inbuatsaihna leh kangmei hmachhawn tura an hmanraw neih ang te endikna, Fire Safety Audit neih a lo rel tawh thu sawiin,  chumi hmain hospital hrang hrangte dinhmun leh hmalak ngai te endik turin member pathum awmna Fire Safety Audit Team-ten enfiahna an nei a. Inspection Report an thehluh thu pawh a sawi a, Damdawi in te hi mipui tamna a nih mai bakah, chhiatna thlen pawha hliam te leh buaipui ngaite lo dawngsawngtu pawimawh ber pakhat an nih bawk avangin, kangmei leh chhiatna dang hmachhawn kawngah an inralrin reng a pawimawh a ni, a ti a. Hemi kawngah damdawi in thuneitute hian mawhphurhna sang tak an nei tih sawi bawk in, Hospital tinte chu Disaster Plan siam turin a chah a. Fire Safety Audit neih hmain rawtna awm te a theih ang ang tihlawhtling ngei turin a chah bawk a ni.

Pu J. Lalthafamkima, S.P. Fire & Emergency Services chuan powerpoint presentation hmangin, Pre-Audit Fire Safety Report a pe a. Hospital tin ten Inspection Report-a rawtna siam atanga hma an lo lak tawh te leh an tih hmabak leh harsatna an nei ang te sawihona hun hman  a ni bawk.

GeoHazards International atangin Hospital Safety chungchanga mithiam bik, Pu Hari Kumar chuan kangmei leh lirnghing laka damdawi in te a him zawknan leh chhiatrupna hmachhawn dan turte powerpoint presentation leh video clip te hmangin inhrilhhriatna leh sawihona hun a hmang bawk a ni

He hunah hian Aizawl D.C. Office-a Officer-te, Aizawl District chhunga Damdawi In hrang hrang aiawh te, Aizawl Municipal Corporation, Disaster Management & Rehabilitation Department, Hospital & Medical Education Department aiawh te leh PWD Building Division atangin Sr. Architect te an tel a ni.