Chief Minister Pu Lal Thanhawla hovin vawin khan G.S Arya Mess,Police Headquarters,Aizawl ah ‘Chief Minister’s Conference -2016 with Mizoram Police Officers’ vawi khatna neih a ni a. Home Minister Pu R Lalzirliana leh Parliamentary Secretary Lt.Col.Z S Zuala(Rtd) te bakah Aizawl leh Mizoram District hrang hranga Police Officer rual te nen he Conference hi hman ho a ni.

Police te hi hun harsa leh hlauhawm,mamawh hun lai,engtia tih tur nge tih midang ten an hriat loh laia tanpui vartu hnai reng an nih avangin Police te leh Police Station chu pan leh biak an nih thin thu Chief Minister Pu Lal Thanhawla chuan a sawi a. Mipuite thian an nih chu hre nawn fo tur leh Dan leh Hrai kengkawhtu pawimawh tak an ni a, an lakah pawh beiseina sang tak a awm ani tiin a vawikhatna atana CM’s Conference with Mizoram Police Officer’s an hmang ho thei chu lawmawm a tih thu a sawi a.Mizoram Police te mipuiin an zah a ,an chhuang bawk a,mipui vantlang chunga mi an nih hrerenga mahni inthununna chungchangah pawh invawng uluk a,taksa tana hrisel lo Ei leh In, Ruihtheih thil ah te insum thei tur leh taksa sawizawi te ngaipawimawh in Police Officer te chu vantlang nawl pui ai chuan Fit reng tur in a chah .

Tunlaiin mi thenkhat sual kawhmawh bawl thin an awm a, chung ho lakah chuan Dan lek kawh a,dan anga chet tur ani tiin Pu Lal Thanhawla chuan mipuite nitin mamawh Gas leh Buhfai phurh lo tih bawrhban tum te lakah Dan anga hma lak tur a nih thu leh Dan kenkawhna lamah tumah thlei bik nei lovin mihring chanvo dikna – Human Rights zah chunga hnathawk in,mi zawng zawng Dan hnuaiah angkhat vek kan nih chu hrereng thin tur in a fuih a. Hmeichhia, Tar leh Rualbanlo te tanpui leh kaihhruai chu an tihtur ah ngaih tlat tur ani a ti bawk.

Police hna hi a hlutzia leh pawimawh zia hriat anih avangin Sorkar pawhin thla 13 hlawh a pe a ni tiin Chief Minister chuan Sorkar laipui atanga Centrally Sponsored Scheme tha tak mai Modernization of Police Forces hnuaiah nasa taka hma lak tawhna chuan tunah rah tha chhuah chho zel tur ah ngaih anih thu a sawi a. Sual hnu chhui kawngah pawh tunlai thiamna thar thuam chhoh ve zel an niin tunah phei chuan Forensic Science lamah te leh Digital Electronic Technology te hmangin CCTV ten thuam chhoh ani tawh a,chuvang chuan Technology thar lamah pawh Police te chu intuaihriam ve reng a pawimawh ani tiin rilru harhvang leh taksa hrisel tak neia Rinawmna leh Taimakna nen a mipui rawngbawlltu an nih hrereng thin turin a chah.

Pu R Lalzirliana pawhin thu sawiin Police chu sorkar hnathawk dang ang in an lo awm ve em tih ngaihtuah fo va, inthlahdah miah lovin mipuite thlamuang taka an awm theih nan a thawktu an ni tih hriatreng a tul thu leh hnathawh nana an mamawh leh harsatna te pawh Sorkarin a hriatpui avangin an nawr pui reng a, a thim a var thlu lo leh ruah leh nisa hnuaiah te rim takin ram leh hnam tan a thawktu an nih hi Sorkar leh mipui in hria in an zah a ni a ti a. Mawhphurhna te hlen a zah leh chawimawi tlaka thawk zel turin a a fuih.

Tun hnai kum 15 vel atang khan Mizoram ah lirthei hrang hrang a pung nasa hle a, Traffic Control pawh hautak tham ani tawh, chutih laia thawktu indaihlo chung pawha Traffic Police ten in sangmar tlat chunga lirthei tam tak an thunun thin chu an fakawm ani tiin Home Minister chuan tunah hian Aizawl kawngpui thenkhatah CCTV dah an ni tawh in dah belh zel tum a nih thu leh hmun hrang hrangah a mit ngei pawha a hmuh thin Police Office leh Quarter chhia te chu thawm that mek tum a hmalak anih thu leh venhimna lam pawh uluk taka kalpui chhoh a nih thu a sawi.

Police mi leh sa te hi ze hrang awmkhawm an ni ve a, ruihtheih thil Zu leh zuk leh hmuamah te an fihlim vek bik lova, chuvang chuan a tul dan leh rem dan a zirin a mamawhte tan Social Worker neih nise tia rawtna awm mek chu bawhzui a tul thu leh a that a beisei thu Minister chuan a sawi a. “Zu hi In theih ani a, Ruih chu a tha lo’ chuvangin khawi hmunah pawh Zu rui chu man theih an ni a, kan ram siam tha turin mitin kan tan ho a ngai a,tunah hian Drugs dona kawngah pawh YMA te nen thawhho a ni dawn a, inhriat pawha thawhhona tha neih a ngai a ni a ti bawk.

Vawiin programme ah hian Pu Thianghlima Pachuau, DGP in programme sawi hawnna leh inlawmna thu a sawi a, Mizoram puma Police te hnathawh dan hrang hrang leh hmunhma te Power Point Presentation hmang in Pu Zorammawia IGP in entir in a sawifiah a. Mizoram Police te hi hmun tam tak ah an indaih lo hle a, mahse chutichungin Mipakhat in mi pathum thawh ang an thawk thei tur a ni tih chu an in fuihna anih thu a sawi a. Sawihona hun tha tak hman a ni a, Pu L.T Hrangchal DIG (NR) in hun tawpah lawmthu sawiin a khar ani.