Zorama cheng mi tinte, khawvel chhandam tura lo piang Lal Krista hmingin chibai ka buk a che u.

Kan hma maiah hian kum 2012 Krismas, Lal pian champha leh Kum thar kan lo thleng leh dawn ta a. 
He mi atan hian mi tinin tisa leh thlarau lamah inbuatsaihna kan nei mek a ni.

Kum thum lai Halpuah leh puakthei lam chi tel lovin Krismas leh Kum Thar kan lo hmang tawh a, hei hian kan
 ramah thil inthlak danglam ropui tak a rawn thlen a tih ngamin a hriat.

1. Halpuah avanga buai thin damlo ten khaw vawt hnuaia mahni inlum chhuahsana hmun fianrial an pan a ngai ta lo.
2. Krismas & Kumthar vuakveta halpuah hal avang leh silai lema inkah avanga inhliam an awm ngai tawh lo.
3. Tul hauh lova sumpai seng a, halral mai mai tur leia buai a awm tawh lo.
4. Kum thar zawha Ar pul hri leng a reh ta.
5. Kumhlui thlahna leh sual thupha chawina leh kum thar lawmna inkhawm (Zan ven inkhawm)  	   


Hei mai hi a ni lo. Holam taka sum sen ralna kan thlauhthlak tak zel avang te, boruak nuam leh ralmuang tak hnuaia 
kan Kut Pui kan hman theih tak avang te hian veng chhung leh khawpui kawtthler cheimawi lamah rilru kan pe thar ta 
hle niin a lang a. Lal piang lawm nana rilru dik zawk leh changkang zawk kan nei ta hi a hun nen pawh a inhmeh zawk a, 
a va hlu teh lul em!
 
Kum thum lai kan lo practice tawh, ‘Halpuah leh a kaihhnawih tel lo Krismas leh Kum thar’ nawmzia kan hriat thar tak 
avanga sumdawng ten an hlawkna tur pawh um duh lova phailam atanga hetiang thil an han la lut lo ringawt mai te, 
mipuite pawhin lei luih tum lova thuawih taka sorkar thuchhuak an han zawm mai te hi a ropui ka ti tak zet a, 
mi tlem te nawmchenna aia mi tam ber thatna tur ngaihtuah phak Zoram mipui zawng zawng chungah lawmthu 
ka sawi tak zet a ni.

Kumin Krismas leh Kum thar kan hmannaah pawh hian mi tinte hi khap ngai ni lovin, a khaptu-ah zawk tang thei zel 
ila, hnam entawn tlakah Zofate hi kan par chhuak ngei ang tih ka beisei tlat a ni.

Chuvangin kan DC tin ten khapna order an chhuah hi lo zah thiam a, hemi keng kawh tura sorkar mi ruat leh beisei,
 Local/Village Council te, YMA leh Police te, Excise leh Taxation Department te thu lo awih a, lo tawiawm turin 
kuminah hian mi zawng zawng ka sawm leh che u a ni.


Kumthar zanah thalai te leh kumpuisul Ham tur ngaia mi lunglengte tan Zoram District Headquarters tinah hlimna 
hmunpui buatsaih tura hma lak a ni mek bawk a. Aizawl ah hmun 6 ah, Lunglei-ah hmun 2 ah, Lawngtlai, Saiha, 
Champhai, Serchhip, Mamit leh Kolasib-ah te hmun 1 theuhah Zai Hlimna Hmunpui buatsaih turin DC tinte hriattir 
an ni tawh.

‘Halpuah tel lo Krismas leh Kumthar’ hlim taka hmang theuh turin Zoram mipuite duhsakna chibai ka buk nawn
 leh che u a, kan zavaiin ‘Isu, vawiinah hian kan thinlung bawng inah, Lo piang thar leh la, Nang kan Chatuan Lal 
turin’ ti thei theuh ila a van lawmawm dawn em.