Tlangnuam khaw kum 100 tlin lawmna chu nimin khan an Community Hall-ah ropui takin neih a ni a. Home Minister Pu R Lalzirliana chu khuallian niin he hun hi a hmanpui a ni.

Home Minister Pu R Lalzirliana chuan kan ram, kan hnam, kan khawtlang nunze mawi lai zawng zawng theihnghilh lova inpumkhata kan awm hian Mizo hnam hi a ropui dawn a ni, a ti. Mizo hi hnam tlem leh naupang te, kum za leh sawm vel liam ta a tuipuiral atanga lokal missionary ten ziak leh chhiar min zirtir hnu a nunphung lo inthlak danglam ta chauh kan ni a. India rama state naupang ber pawl ni mah ila, state inkhairual ber kan ni a, ram dang nena khaikhin ralah chuan mihausa leh rethei zawk te khawsak phung pawh a la inthlau lo hle a ni, a ti. Home Minister chuan ram thangmek kan nih avangin duhthusamin engkim thleng vek lo mahse ram hmasawnna tur hian theihtawp chhuahin sorkar chuan tan a la, a ti a. Hlemhletna dona kawngah pawh nasa taka hma la in hemi kawngah hian ramhruaitute bakah kohhran hruaitu te, mipui ten theihtawp kan chhuah a pawimawh a ni, a ti. Pu R Lalzirliana chuan Tlangnuam khua kum 100 tlin a lawmpui thu sawiin hmathlir thui tak neih avanga chona leh harsatna tam tak paltlanga Tlangnuam khua lo dintu mi hmasate leh khaw nuam tak a nih ngei theih nana rahbi lo tuktu zawng zawng te chhuanawm a tih thu a sawi bawk a ni.

Tlangnuam Centenary lawmna inkhawm hi Organising Committee Chairman Pu RTC Zoramliana’n a kaihruai a. Jubilee dar vawi 100 vuak a nih bakah khuallian, Home Minister hian Centenary lungphun a hawng a. Tlangnuam khaw chhuak hlaphuahthiam Zasiama leh Sialkhawthanga te chanchin Pu RL Thanmawia ziak chu Minister hian a tlangzarh bawk a ni. Tlangnuam khua hi 1912 vel khan Pawibawia hova din a ni a, a tirah chuan Melveng tih a ni. A khaw hmun a nuamin nula leh tlangvalten thing phurh nan an hmangin chak lak nan a hmun hi a nuam a, chuvangin a khaw hming 'Tlangnuam' tih hi a pu ta a ni. A tirah chuan In 23 vel lek a ni a, a hnuah In 50 vel khua a lo ni ta a, tunah hian In dinglai 300 dawn lai a awm tawh a ni. He khua hi Thingsulthliah khua atangin km 2 vel leka hlaa awm a ni.

Home Minister Pu R Lalzirliana hian kumin chhunga Tlangnuam khuaa boral mi pakua te ralna hun a hmang nghal bawk.