2159/2024-2025

Aizawl the 21st September, 2024 : September ni 27 & 28, 2024 chhungin '21st Annual Conference of Commonwealth Parliamentary Association, India Region, Zone-III' Aizawl, Mizoramin a thlen tur chungchangah  vawiin khan Mizoram Legislative Assembly Commissioner & Secretary Pi Vanlalthantlingi hovin a office chamber-ah meeting neih a ni a. He meeting-ah hian a kaihhnawih tur sorkar department hrang hrang official-te leh Assembly Secretariat official-te an ṭhukhawm a ni.

Ni hnih awh tur '21st Annual Conference of Commonwealth Parliamentary Association, India Region, Zone-III' hmang tura palaite an thlen kim ni September ni 26 (Nilaini) tlaiah Executive Committee Meeting an nei nghal ang a. A tuk September ni 27 (Ningani) chawhmaah Lok Sabha Speaker Pu Om Birla chuan MLA Library-a Archive Cell thar a hawng ang a, chumi hnuah CPA Annual Conference chu hman ṭan a ni ang. Mizoram Speaker Pu Lalbiakzama'n palai zawng zawngte lawmna thu a sawi zawhah Nagaland Speaker leh CPA Zone-III Chairman ni bawk Pu Sharingain Longkumer-in keynote address a sawi ang a; Mizoram Chief Minister Pu Lalduhoma, Rajya Sabha Dy. Chairman Pu Harivansh Nayaran Singh leh Lok Sabha Speaker Pu Om Birla ten thu an sawi zui dawn a ni. A ni khatnaa Plenary Session-ah an ngaihtuah leh sawiho tur thupui chu 'Inclusion of the Northeast Region in the Indian-ASEAN Vision for Trade and Cooperation' a ni ang.

CPA Annual Conference ni hnihnaah an thupui sawiho tur chu 'Merging the Ministry of DONER with NEC for better strategic planning and coordination of various projects in the region' a ni ang a. Mizoram Parliamentary Affairs Minister Pu Vanlalhlana'n lawmthu sawina hun hmangin Conference hun a khar dawn a ni. Conference neih chhung hian palaite tan cultural programme leh zanriah kilhona buatsaih a ni ṭhin bawk ang.