Zoram mipui duhtak te chu

COVID-19 hripuiin khawvel run in, India ram leh Mizoram pawh a rawn hrut tel avanga kan harsatna chu ka hre tlang vek a. Hemi atan hian kan vaiiin kan theihtawpin kan tha leh zung sengin kan thawk a. Sum leh pai pawh kan theih ang tawkin COVID-19 beihna atan hian mimal, pawl, kohhran leh association hrang hrang, kil tin atangin kan hmu a. Heng kan Covid Fund hi Chief Minister’s Relief Fund ah kan chhungkhawm a. Chumi hmang tur chuan committee pawh mumal takin kan Chief Secretary ho in siam niin, tangkai thei ang bera hman dan tur an ruahman angin kan han hmang chho ta zel a ni. An ngaihtuahna pawh an hmang uluk a, rin aiin kan hmang daihzai a, a lawmawm kan ti. 

Chutihrual chuan kan Covid fund ringawt hian emaw sawrkar hi sum leh pai lamah kan kal ang ti kan awm palh ang tih a hlauhawm a. Sum sen mamawhna chi hrang hranga he sawrkar, mipui leh pawlte kan tan tlan dan hi kan hriat a tha in ka hria a, chu chu ka sawi tur chu a ni.

• Tunah hian Lockdown avang hian Mizoram pawna mi Mizoram chunga tangkhang kan nei teuh mai a. Chungte chu kan state task force, district leh local thlengin kan tang tlang a, ei tur leh awmnaah harsatna an neih loh nan kan buaipui a. SDRF sum hmangin an ei tur kan tum sak reng a ni.

• Chutiang bawk chuan state danga kan Mizo unaute tangkhang tam tak an awm a. Chung mite chu an hming, an chenna, biak pawhna tur number te leh information pawimawh dangte theih ang angin kan la a, an awmna state sawrkar hnenah kan hrilh a, an harsatnate hrilhin lo ngaihtuah turin kan hrilh a. Anni lam pawhin an ei tur leh thil dang dang an lo ngaihtuah sak ve a. Kan rama tangkhangte kan buaipui thin ang thovin an lo buaipui ve mek bawk a ni.

Amaherawhchu, chumi piah lamah chuan an tih sen loh an lo awm a. Kan mi te pawh an khawngaihthlak a, harsatna chi hrang hrangin a tlakbuak bawk avangin Mizoram sawrkar pawhin a puih dan tur ngaihtuah in, CM relief Fund atang hian theihtawpin ruahmanna kan siam a. Rualkhai thei ang bera puih dan tur kan Chief Secretary hovin committee in a ngaihtuah a.  State hrang hrangah te leh Mizo welfare awmsa leh siam chawp te pawh, anni kaltlangin leh, Mizoram House awmnaah chuan house a mawhphurtute kaltlangin sem turin kan ti a. Cheng 1,58,36,000 tun hnai khan kan pe a, thawn mek niin,  a then chu la hmuh kimloh te a ni.

• Heng bakah hian Mizo welfare neilo, mal tlat deuh an awm nual mai a. Chungte chu helai atanga direct a pek loh theihloh a ni a, chung atan chuan nuai 2 vel kan reserve bawk. 

• Kan Chin unau, Delhi-a tangkhang an awm teuh bawk a. Anni tan hian tun atan chuan Rs 5,00,000 kan pe ve bawk a. Anni hi India ram PM, Delhi CM, Myanmar Ambassador leh Myanmar a an sawrkar hotute hnenah lehkha ziak a, harsatna an tawhnaah puih dil tura thurawn pek an ni bawk.

• Mizoram pawna Mizoram House hrang hranga thleng mek, lock down vanga tangkhangte zingah sum lama harsa, awm man leh ei man pe theilote chu an ei man lak sak lovin, an thlen man pawh awl sak tum a ni a. A zat chiah tur hi la sawi mai theih a ni lo.

 

• Mumbai ah tunhnaiah cancer damlo leh anmahni enkawltute zingah he natna hi hmuhchhuah a ni a. He COVID-19 test man atana senso Rs. 2,52,000 pawh CM Relief Fund atang hian pek a ni ang.

• State dang atanga lo lut turte danga, ramri venga ngawrh taka duty hah tak tak task force leh tualchhung mi leh mi dang dang an awm a. Chungte tan chuan cheng nuai 57 kan sem dawn bawk a.

• Relief Fund semchhuah hmasak zawka dawng ve lo Home, Centre leh Rehabilitation Centre  te hnenah tanpuina cheng 2,98,500 tunhnaiah kan pe bawk. 

• Tichuan tunhnaia kan han pek mai pawh nuai 227,86,000 niin,  fund tlingkhawm atanga pek te a ni a. A hma khan pek tawh lo ni bawkin, he covid fund atang hian task froce hrang hrang leh home leh centre hrang hrangah te nuai 230 zet kan lo pe tawh bawk a ni. Han belhkhawm ringawt pawh hi nuai 457 chuang, vaibelhchhe 5 hnai thuak a ni a. Mimal, kohhran leh pawlin kan thawhkhawm atanga kan hman pawh a tam tham tawh hle a ni.

• Account hrang hrang, head hrang hrang ami lakkhawm leh pawhkhawm theihna apiang atanga lakhawmin kan han hmang a. Health Department-ah ringawt hian keimahni budget atang ringawt in vbc 5 kan pe a, kan hmang char char a. Health Department-a a hmaa kan pek sa hrim hrim pawh nuai 50 a awm bawk a. Hospital-ah emergency a ICU siam nan equipment hrang hrang te, civil works leh man power phuruk nan leh thildang atan budget atangin nuai 660 kan pe bawk. Chu chang chu nilo in, State Disaster Relief Fund atang hian nuai 350 bawr vel kan dah bawk a. Tichuan, Health Department in an khawih tura kan dah, CM Relief Fund tel hauh lova an khawih tur state in kan dah chu hi cheng nuai sang khat zanga leh sawm panga leh sang nga a ni.

• Supply lam hi a hautak ber a ni a. Tunah chuan kan mipui ten eitur an neih theih nan a awm ang ang hmang ang kan ti a. Buhfai kan la khawm ngat ngat a. Thla khatah hian bazar atanga buhfai kan lei hi quintal 70000 atanga 80000 a ni thin a. Tun hmaa kan leina thin kha he kan hrileng avang hian a rawn pung ta a, kg khat zelah cheng sawm chuangin a rate a pung ta a. Sawrkar sum sen pawh a tam phah hle a ni.

Supply phurh chungchangah pawh phur duh an tlem ta hle a, carrying charge a pung a, loading leh unloading man pawh a ti tur mi hmuh an har em em avangin a hma aiin a to phah ta hle a ni. Supply atana hmanni lawka kan sanction ringawt pawh crore 30 chuang a ni.

• Tichuan, pawisa senso a tam zia chu kan hre thei in ka ring a. Chung bakah chuan pawisa hmuh theihna tur kawng dang dang kan han hnuk khawm a. Kan LESDE Department lam atang hian kan hmuh theih ang ang kan han dap a, nuai 2100 kan hnukkhawm a. Chung chauh chu nilo in, ni 100 inhlawhna – January, February leh March thla tlingkhawm ba kha central lamah rawn pe vat turin kan zuk ti a, anni lam pawhin an rawn ti vat a. 

Chu chu nuai 5200 niin, mipui te account ah kan thun tawhin, a thenah chuan la thun kimloh pawh a awm ang. Tichuan theihtawpin kan inhnukkhawm a ni.

• Kan state in covid avanga kan sen belh hi vaibelchhe tel tam a ni a. Chu chu mipui ten min lo hriatsak ka duh a. He covid hian engtikawng pawha harsatna lian min thlen loh nan inbuatsaih kan tum a theihtawp kan chhuah a ni tih mipuiin min hriat sak ka duh a. A engpawh chu ni se, sawrkar chuan a nuai a sing bi pawh ni se kan seng tur chu a ni a. He hri hi a reh dawn nge a la awm rei dawn tih kan hriatloh avangin medical lamah te, suppy lamah leh kawng hrang hranga kan inbuatsaihnaahte kan tang chho zel ang a. Mipui, pawl, kohhran te kan theih ang angin CM Relief Fund ah hian theih ang ang thawhkhawm ila. Kan himna tura duty hah tak takte chhawk nan tan la thar leh turin ka sawm duh a ni.

• Kan hmabakah hian khawvel ecoomy engtin nge  aawm dawn kan hrelo a, India economy pawh, Mizoram economy pawh. Tihchhiat a kan awmloh nan thawihtawp kan chhuah ang a. Amaherawhchu beiseina sang tak ka neih chu kan economy lo chhe ta pawh ni se kan rinchhan ber chu India sawrkar chu a ni ngei mai, mahse Mizoram kan vanneihna chu a chhunga chengte a let tam taka chawm zo ram tha tak kan nei a. SEDP programme pui kaltlanga ei leh ina intodelh a, kan thil tharchhuah hmanga sum tam zawk dehchhuah nan hmalak kan tumna hi kan chhawpchhuah chuan, state thenkhatte ai chuan nasa takin bultanna tha zawka tan thei in Mizoram hi kan awm tih ka ring a. Pathianin harsatna nasa lutuk tawng lovin kan talchhuahna tur min siam sak ang tih ka ring a ni. 

• Engpawh ni sela, tunah hian sawrkar a theihtawpin a tang a, mipui kan theitawpin kan tang a, YMA leh pawl dangte theihtawpin kan tang a, kan MLA te zawng zawng bial tinah an theihtawp chhuahin an mimal pawisa thleng an hmang tel a. Chuvang chuan tumah indem emaw insawiselin awmlo ila ka duh a. Miin sawrkar pawh hi dem duh se chuan demna thu sawi turin a khat  ang. Mahse khawvel in hripui, mi a sing tel a an thihna kan do mek a ni tih hria ila. Ni dang kan anglo a. Nuamsa in kan awm theilo. Damkhawchhuah kan tum a ni. Chumi karah chuan keimahni leh keimahni inmawhpuh a insawisel thei kan nilo. Amaherawhchu tan kan lak a, kan theihtawp a kan intawiawm tlan a kan tangkhawm a tul a. Kan hlawhtling ngei pawh kan ring a. Mizoram hian he harsatna hi Pathian tanpuina in kan su tlang ngei ka beisei a. Mipui zawng zawng chet dan ka en hian beiseiawmin ka hria a, lawmawm ka ti a. Chuvang chuan thlamuang taka awm turin mipui pawh ka chah duh a ni.

Ka lawm e.