Vawiin chawhnu dar 2:00 atang khan Sports Minister Pu Zodintluanga chuan March 20-23 inkara Aizawl-a 26th North East Games nghahna tur hmunhmate a tlawh kual a. Sports Minister hian infiammi tam zawkte thlenna tur State Referral Hospital, Falkawn a inbuatsaihna kal mek chu fangin, mipa leh hmeichhia riahna tur te, inthiarnana tur hmunhma te, eirawngbawlna leh chaw eina hmun tura ruahmante chipchiar takin a en a ni. Referral Hospital, Falkawn-ah hian state 8 atanga infiammi lokal tura beisei zinga mi 1200 vel thleng tura ruahman a ni a; mi dangte chu Ramhlun Sports Indoor stadium-ah thlentir an ni dawn a ni. Tin, Falkawn-ah vek hian Wrestling intihsiakna chu nghah a ni ang.
Sports Minister Pu Zodintluanga chuan Mualpui-a Rajiv Gandhi Stadium buatsaih mek te, stadium kianga motor parking tur leh indoor stadium sakna tur hmunte a fang nghal a. Rajiv Gandhi Stadium-ah hian artificial grass phah hna leh intlansiakna tur synthetic rubber phah hna zawhfel a ni tawh a; intlansiakna tura bautsaihah hian chawlhkar tharah khian line rin fel a ni ang. Mipui thutna tur gallery siam hna pawh field sir hrul khatah ngawrh taka siam mek a ni a; zawh fel a nih hunah chuan field pum hi mipui thutna tur dawhsanin a hual chhuak dawn a. Dawhsan kual chhuak hian bucket chair rem leh tur a ni a; mipui sing hnih leng tura beisei a ni. Rajiv Gandhi Stadium-ah hian NE Games hawnna leh kharna inkhawm neih a ni ang a; athletics, football leh volleyball khelhna hmun atan ruat a ni bawk.
Judo leh weightlifting intihsiakna hmun tura buatsaih Hawla Indoor Stadium, Republic Vengthlang a mi pawh Sports Minister hian a tlawh nghal a; he stadium pawh hi ngawrh taka cheibawl mek a ni a; NE Games thlenna tura engkim peihfel hman a nih tur thu a buaipuitute chuan Sports Minister hi an lo hrilh a ni.
Vawiina NE Games nghahna tur hmunhma a tlawh chungchanga chanchinbumite zawhna chhangin, Sports Minister Pu Zodintluanga chuan, “26th National Games hi tlin taka thlen tumin chanvo neituten an mawhphurhna ngawrh takin an kalpui a; a hun takah engkim kan peih hman dawn avangin lawmawm ka ti hle a ni” a ti. Mizoram aiawha infiammi tel turte inbuatsaihna chungchangah Sports Minister chuan, “Inbuatsaihna tur hmunhma duhthusam kan la nei lo nain, kan theih tawpa thain kan inpuahchah a; Hun lokal lehzel turah erawh chuan kumpui lingletin hmunhma duhthusamah kan inbuatsaih thei tawh dawn a; Mizo infiammiten national leh international level-ah hming kan chher chho ngei ang tih ka ring a ni” a ti bawk. Thalaite hmasawnna tur leh tuihalnate hriatpuitu leh phurpuitu Chief Minister Pu Lal Thanhawla thahnemngaihna achungah lawmthu sawiin, “Kawng engkimah min phurpui a; tuna North East Games kan thlen tur hi chona kan hmachhawn hmasak a ni a; hemi hnuah hi chuan Mizoram-a National Games thlen hi kan hmathlir leh kan goal a ni taw hang” Sports Minister chuan a ti bawk.
North East Games hi 20th March, 2012 (Thawhlehni) ah neih tan a ni dawn a; infiammna chi hrang 11 a awm dawn a ni. Union Sports Minister Pu Ajay Maken chu a hawnna hunah hian khuallian tura beisei a ni a. Hemi ni vek hian Rajiv Gandhi Stadium sira Indoor Stadium lian tak sakna tur lungphum pawh phumin, Hawla Indoor Stadium, Republic Vengthlang-a mi pawh hawn nghal a ni ang. Vawiina Sports Minister-in NE Games nghahna tur hmunhmate a fan kualnaah hian Mizoram State Sports Council hotute bakah, a hmunhma buaipuitu Department hrang hrang aiawh te, NE Games Organising Committee hruaitute leh chanchinbumi thahnem takin an tawiawm a ni.
