Vawiin March 8 hi khawvel puma Hmeichhiate Ni atana hman a nih angin Mizoram State Legal Services Authority leh AIKO (NGO) te tangkawpa huaihawtin vawiin chhun dar 12 khan Chanmari YMA Hall ah hemi pual hian hun hman a ni a, Law Minister Pu Lalsawta’n a hmanpui.

Khuallian Pu Lalsawta chuan Mizoram-a hmeichhia te chungah hleihlenna leh pawngsual tam ta lutuk chu kan khawtlang nun a zalen lutuk vang a ni thei a ni tiin Mizo hnam kan inenlet a ngai a ni, a ti a. Hmeichhia te chunga kutthlakna leh pawikhawihna thleng thin ven nan sorkar, kohhran leh tlawmngai pawl ten ngun taka ngaihtuaha hmalak a tul tawh tak zet a ni, a ti bawk. Mi harsa zawkte tan Dan/Court lama kaihruaia tanpui turin Sorkar Laipui chuan ruahmanna a siam vek a, mipui ten chu chu kan hriata kan chhawr tangkai a pawimawh a ni, a ti. Tunlai khawvelah court thu chanchin nitin hmuh tur a awm a, mipui ten Dan hnuaia kan chanvo te kan hriatchiana, Magistrate, Court leh Police te pawh mipui tanpui tura awm an nih hriaa, harsatna kan tawh hunah pawh Court / Lok Adalat te min tanpui turin an awm reng a ni tih kan hriat tlan a tul a ni, a ti.

International Women’s Day programme ah hian Mizoram State Legal Services Authority Member Secretary Pi Marli Vankung chuan Women’s Day programme hman a nih chhante sawifiahin Hmeichhia te chanvo leh humhimna Dan inhrilhhriat nan hman a nih thu a tarlang a. India rama Dan tam tak awm chu mipuiin kan hriat loh chuan awmzia a neih loh avanga Dan inhrilhhriat nan Awareness Campaign te pawh huaihawt a nih thin thu a sawifiah a, Dan hriatna chuan sorkar laka kan mawhphurhna te pawh kan hriat phah dawn a ni tiin school naupang zirlai te zingah te uar zawka Dan inzirtirna kalpui tum a nih thu te, mipui tam zawkin kan chhawr tangkai theih nana Dan lama inkaihhruaina Legal Aid Clinic te pawh a duh leh mamawh apiangte tana pan theih tura hmun hrang hranga din tum a nih dante a sawifiah bawk. Court-a inkhin buai hrep ai chuan tha taka inrem theih a tha ber tiin Pi Marli chuan chutiang zawnga mipui kaihruai tur chuan Lok Adalat te pawh kan neih thu a tarlang bawk.

Hmeichhia te Ni hun hmanna ah hian Hmeichhia te chunga pawikhawihna leh pawngsual chungchang te, inchhung khura hmeichhia te chunga kutthlakna chungchang te mithiam ten sawiin sawihona hun te an hmang bawk a ni.