Vawiin chawhma dar 11:00 khan DC Conference Hall, Keifangtlang-ah Champhai District Deputy Commissioner Pu Vijay Kumar Bidhuri kaihhruaiin District Level NLUP Implementing Committee leh District Level NLUP Monitoring Committee meeting neih a ni.

Meeting ah hian kum 2010-2012 chhunga NLUP Line Department hrang hrangte hmalakna report ngaihthlak a ni a.Line department te hian spot verification an neih vek hnuah fund (pawisa) an sem thin a. Tun dinhmunah chuan installment hrang hrangte sem chhuah mek anih thu ngaihthlak a ni.

NLUP Line department hrang hrangte hian beneficiaries te endik dan tur chungchang sawi hovin, department hrang hranga field staff ten a remchan dan ang zelin spot verification an nei ang a, monitoring committee ah report an pe thin ang. Monitoring hna thawk tur hian line department te in hmang tangkai tawn (cross monitoring) turin ruahmanna siam a ni a, hemi chungchangah hian Village Level Monitoring Committee te nen tang hovin NLUP hlawhtlinna turin hma an la dawn a ni.

Beneficiaries ten ram chungchangah harsatna an neih chuan Line department kaltlangin DC hnenah report vat tur a ni a. Land base-a trade thlangte chu VC ten ram an pe ngei tur anih thu sawi a ni a. Beneficiaries te ram, ranvulh ten an tihchhiatsak thin chungchangah VC tinte hnenah a theih ang ang a siamremin hna lo thawk tur leh pumpelh tura tan la theuh turin DLAO chu Order chhuah turin ngen a ni.

Beneficiaries hma la tha duh lo te chunga action lak dan turah chuan Danin a phal angin hma la lote chu an pawisa dawn pawh lak kir sak tur a ni a. Hetiang hi a thlen lohna turin Line department leh Village Level Monitoring Committee ten theihtawp chhuah se tiin rel a ni. Tul bik thil a Trade thlak ngai an awm chuan line department te leh DC hriatpuina lo chuan hma lak theih anih loh thu beneficiaries te hnenah hriattir nise tih a ni bawk.