Vawiin chhun khan Serchhip DC Meeting Room-ah Asian Development Bank sum atanga siam tur Kilometre 55 a thui “Serchhip to Buarpui Road” tihpuitlin theihna tur atana thil pawimawh zualte ngaihtuahin sawrkar aiawhte leh he project in a nghawng theih khaw hrang hrang Village Council aiawhte an thukhawm a, District bawrhsap Pu P.Lalchhuanga MCS in meeting hi kaihruaiin, kawng siam hnathawk tu tur Project Implementing Unit (PWD) Project Director Pu Lalrinkima Hnamte pawhin a telpui a ni.

District Bawrhsap chuan compensation beisei san lutuk avanga Project a zuihral mai a hlauhawm zia an khua leh tui te zirtir uluk turin Village Council aiawhte chu a chah a, mimal hamthatna ngawt ngaihtuah lova khawtlang hmasawnna daltu ni lo tura rilru siam a, an khawtlang hmasawnna chu anmahni bawk a zar zo tur an ni tih inhrilh chian ngai a tih thu a sawi bawk.

PIU Project Director chuan Serchhip atanga Buarpui thlenga kawngpui laih tur chungchanga endik hna (assessment) lo neih tawh chu an zirchianin compensation (zangnadawmna) pek ngai an tam lutuk dawn a, cheng vaibelchhe thum (Rs. 3 crore) chuang pek ngai dawna a lan avang leh, hemi atan hian cheng nuaih 55 (Rs. 55 lakhs) chiah Asian Development Bank in a phalsak bawk si avangin harsatna a awm thei a, Project tihhlawhchham mai a hlauhawm avangin senso tlem dan tur ang ber ngaihtuah ho a tul a, ADB hian Project tihhlawhtlinna tur chuan State sawrkarin harsatna awm thei zawng zawng (land clearance etc) chingfel hmasa tura a phut bawk si avangin hnathawh tan hma duh chuan harsatna awmthei te sukiang tura VC te nen tanho a tul thu a sawi.

Vawiin thukhawm hian compensation atana senso tihhniam dan tur ngaihtuahin, Serchhip leh Buarpui inkar kawng chu a PWD, Revenue Department leh Village Council ten a huhova ennawn (re-assess) leh nise an ti a, a hun atan Marchi ni 13 leh 14 hi an ruat fel nghal bawk a ni.

Serchhip to Buarpui Road hi ADB fund atanga siam tur a ni a, kawngsirah mimal ram, in leh lo a tam avangin compensation atana senso a tam lutuk dawn a, assessment report ah chuan LSC 71 (Serchhip-3, Thenzawl-15, Buarpui-53), Periodic Patta 53 (Serchhip-19, Sailam-3, Thenzawl-7, Buarpui-24), House Pass 6 (Thenzawl-5, Buarpui-1), VC Pass 137 (Serchhip-27, Sailam-1, Thenzawl-50, New Khawlek-19, Buarpui-40), DPL 1(Buarpui), Forest Pass 1 (Thenzawl) leh Temporary Pass 1 (Serchhip) a awm a, mimal chenna in tihchhiat ngai 82 (Serchhip-9, Thenzawl-10, New Khawlek-13, Buarpui-50), Sawrkar/Khawtlang Building tihchhiat ngai 6 (Thenzawl-1, New Khawlek-4, Buarpui-1) a awm bawk a, hei hi uluk taka enthat leh a, In dinglai tihchhiat ngai zat te leh LSC etc. khawih tel ngai zat te tihtlem theih an inbeisei a ni.

Serchhip leh Buarpui inkar kawng siam hna hi International Contract niin, kilometer 55 vela thui a ni. Pawisa cheng vaibelchhe 169.7 (Rs. 169.7 crore) senga siam tur a ni a, hetah hian sawrkarin cheng vaibelchhe 6.47 (Rs. 6.47 crore) a thawh ve a ngai a ni. He kawng hi Sailiamkawn atanga tanin Buarpui thleng a kal dawn a, kawngpui zau zawng hi 8.7 metres tur a ni a, kawng kual lai chu 9.2 metres a zau a ni ang. Hei bakah hian Mat Lei (bridge) leh Tlawng Lei (bridge) te siam thar a ni dawn bawk a ni. He Project atana tangka sen tur 70% hi ADB in a tum ang a, a bak 30% chu Sawrkar laipuiin DoNER Ministry kaltlangin a tum ve ang.

Vawiin thutkhawmah hian official lam atangin Serchhip D.C., PIU Project Director, Thenzawl SDO(C), PWD SDO Thenzawl Division leh Hmuifang Division, ASO Serchhip te an tel a, non-official lam atangin Project in a nghawng tur khaw hrang hrang Buarpui, New Khawlek, Sailam, Thenzawl North, Thenzawl East, Thenzawl West, Serchhip-I, Serchhip-II, Serchhip-III, Serchhip-IV, Serchhip-V, leh New Serchhip Village Council aiawhte an tel a ni