1646/2024-2025

Aizawl 19th August, 2024: Vawiin chawhnu dar 1:30 pm khan Secretariat Conference Hall, MINECO Aizawl-ah Directorate of Geology & Mining (DGM), Commerce & Industries Department, Mizoram bultumin 29^th State Geological Programming Board (SGPB) Meeting neih a ni.

SGPB Meeting hi kum tin neih thin niin Chairman chu Secretary, Commerce & Industries Department niin Member Secretary chu Director, Geology & Mining, Mizoram a ni. He meeting hi Secretary Pu Dr. Lalzirmawia Chhangte, IAS chuan a kaihruai a. Geology & Mining bakah Geological Survey of India (GSI) te leh State chhunga an service mamawhtu (Line Department) hrang hrang heng- Deputy Commissioners/ District Disaster Management Authority (DDMA), ONGC, Oil India Ltd., PWD, BRTF, Central Water Commission (CWC), Aizawl Municipal Corporation (AMC), UD&PA, Disaster Management & Rehabilitation (DM&R) Deptt, Land Revenue & Settlement Deptt. etc bakah Department pawimawh heng- EF&CC Deptt., Finance Deptt., Planning Deptt., PHE Deptt., Mizoram University & PUC (Geology Deptt.) etc. hotute an tel a ni.

29^th SGPB Meeting-ah hian kum kalta 2023-2024 chhunga Directorate of Geology & Mining (DGM) leh Geological Survey of India (GSI) [Tripura-Mizoram Circle] hnathawh hrang hrangte tarlan niin, Nikum lama SGPB Meeting neih taka Agenda passed tawhte hmalakna- Action Taken Report (ATR) leh tun kum kal mek 2024-25 chhunga Work Programme te sawiho niin tun meeting-a Agenda lutte sawihova pawm a ni.

Sorkar kum liamta 2023-24 chhung khan Directorate of Geology & Mining (DGM) chuan sorkar sum bawmah minor minerals (lung, balu etc) atangin Non-Tax Revenue Rs. 11,25,69,183 an chhunglut a, Petroleum Exploration Licence (PEL), Fee atanga an hmuh Rs. 1,24,99,890/- leh Laboratory Testing Fee Rs. 4,22,080/- chhunglut bawkin a vaiin Rs.12,54,91,153/- chu Mizoram Sorkar sum bawmah an chhunglut a ni. He hi Geology & Mining-in Mizoram sum bawm a sum chhunluh tam ber a la ni. Hetih lai hian DGM chhungah Mizoram pum enkawltu thawktu nghet chu 48 an niin sanctioned post chu 86 a ni.

Kum 2023-24 chhung hian Directorate of Geology & Mining (DGM) hman tur Dan thar pahnih (2) : The Mizoram Minor Minerals [Concession & Prevention of Illegal Mining], Rules 2023 leh The District Mineral Foundation Rules of Mizoram, 2023 te chu Mizoram Legislative Assemby - ah 22^nd August, 2023 khan lay a ni a, Mizoram Gazette Notification dt. 4^th October, 2023 ah chhuah niin hman mek a ni.

He 29^th SGPB Meeting ah hian Directorate of Geology & Mining (DGM) buatsaih Annual Report 2023-2024 chu tlangzarh a ni bawk.