1645/2024-2025

Saitual, the 19th August, 2024: Vawiin khan Saitual District-a hmasa ber ni turin Govt. Saitual High School Assembly hall-ah Pipe Band Academy leh Rani Lakshmi Bai Atma Raksha Prashikshan (Self Defence for Girls programme) hawnna neih a ni a, Saitual Bawrhsap Dr. Lalngura Tlau, District Education Chairman ni bawk chu khuallian niin hawnna hun a hmanpui.

He hunah hian Dr. Lalngura Tlau chuan thu sawiin Saitual district chu district dangte ruala ke a pen ve theih nana Pipe Band Academy leh Self Defence zirna duan a ni chu lawmawm a tih thu a sawi. Bawrhsap chuan Sawrkar ni pawimawh tak tak Independence Day leh Republic Day-ah te pawh pawn lam mite tihbuai ngai lo a District chhunga High school naupangte ngei atanga Pipe Band an nei ve thei tawh tur chu a lawmawm a ti a, zirlai naupangte pawh thahnemngai taka zir tura fuihin, Pipe Band intihsiakna hrang hrangah te pawh inhmakhua chho zel turin a chah bawk a ni.

Tunlai khawvelah hmeichhiate an him lo em em a, chuvang chuan invenhim dan inzirtirna  Rani Lakshmi Bai Atma Raksha Prashikshan (Self defence training for girls) buatsaih a ni chu a lawmawm a tih thu Bawrhsap chuan a sawi a. Taekwondo chu tute tan pawh thiam a tul tih sawiin, zirlaite pawh mahni diknaa huaisen taka tang ngam turin a chah bawk a ni.  

Kum 2022 khan Mizoram Taekwondo Association of Mizoram (MATA) te leh SPD chuan inremsiamna neiin, Rani Lakshmi Bai Atma Raksha Prashikshan ( Self defence training for girls) Saitual District-ah pawh bul an lo tan ve tawh a. Kuminah erawh chuan District kuta dah niin, District-in a kutken chho tan ta a ni. Zirlai hmeichhia UPS (Middle School) atanga Higher Sec. School zirlai zawng zawngte tan he programme hi duan a ni. He programme hi zirlaiten an hlawkpui thin hle a, zirlai thenkhat chu he programme kaltlang hian Taekwondo game luhchilhin hlawhtlinnate pawh an lo chang tawh a ni.

Self defence training hi Saitual district chhunga middle, high school leh higher zirlai hmeichhiate tana ruahman a ni a, Taekwondo zirtirtu (blackbelt) hi mi pa 5 an awm a, chungte chu- Lianthangpuii, Lalliankimi, Zohmingthangi, C. Lallawmsanga leh Zoramsanga te an ni a, class hi vawiin atanga tan tura ruahman a ni. 

Pipe Band Academy hi PAB 2023-2024 in a pawmsak tawh angin kumin hian District sawm (10)-ah Pipe Band Academy hi din tur a ni a, District Office atangin Pipe Band Academy awmna tur school hi thlang tura tih niin District Project Office, Samagra Shiksha Saitual District-te chuan Govt. Saitual High School chu an thlang ta a ni. Pipe Band bul tanna atan hian ₹ 400,000/- dawn a ni a, chu chuan a daih loh avangin office pawisate nena tangkawpa kalpui chhoh mek a ni. Pipe band hi Zirlai pawl 9 te tana ruahman a ni a, ni 7 August 2024 zingkar atang khan class hi neih tan a niin, Pipe band zirtirtu (Instructors) te chu Lalmuansanga (Piper & Major) leh Lalhmingthanga (Drummer, Major, Bass drummer) te an ni. 

He hawnna programme hi District Project Office, Samagra Siksha, Saitual District huaihawt niin Pu K. Lalnunfela, DEO & DPC Saitual District chuan a kaihruai a. Khuallian Saitual Bawrhsap Dr. Lalngura Tlau chuan thu sawiin, Pipe Band leh Self Defence for girls sawi zauna leh report kimchang hi Pu C. Vanlalhriatpuia, Project Assistant DPO hnen atanga ngaihthlak a ni. He hun hi Pi Chhuanhlupuiii, SDEO & Addl. DPC Saitual District chuan lawmthu sawinain a khar a. Pu Biju Nath Singh, Headmaster, Govt. Saitual College, Pi F. Zodingpuii, DIPRO, thu thar lakhawmtute leh High school zirtirtuten an telpui bawk a ni.