1644/2024-2025

Aizawl; the 19th August,2024: Vawiin chawhma dar 10:30 khan Vanapa Hall-ah I&PR Department, Mizo Photographers' Society (MPS) leh Photography Club of Mizoram (PCOM) tangkawp te'n  World Photography Day vawi 185-na pualin programme an buatsaih a. Art &Culture Minister Pu C. Lalsawivunga chuan khuallian niin programme  a hmanpui.

Vawiin World Photography Day-2024 lawmna-ah hian thu sawiin Khuallian  chuan World Photography Day puala programme changtlung tak Thlalami Inzawmkhawm pawl leh I&PR Dept te'n in buatsaih hi lawmawm ka ti tak zet a ni. Mi tinin smart phone kan hum fur tawhna leh mi tinin thlalak kan uar em em na khawvelah kan cheng mek a. Mahni leh midang tana mualpho theihna tur pawh then hrang thiam tawh lovin, thla ka la-in kan thehdarh nasa mah mah niin a hriat a ni. Chutiang khawvela kan chen mak lai hian MPS leh PCOM te hian a tha zawnga kan hnam ziarang leh incheina te, kan ram mawina leh khawtlang nun te  khawvel zau zawka phochhuahna kawngah sulsutu leh kawng kawhhmutu ni tum tlat ang che u. Vietnam indona-a khawvel dengchhuak hmeichhe naupang thlak “Napalm Girl”  aurinzia leh thil tihtheihzia te kha photographer te chuan in hriat vek kha!.  Thu tam taka sawi aiin  in thlalak te hmangin Mizoram mawizia leh nawmzia te, kan Khawtlang nun mawi tak te hi khawvel zau zawka inpuang darh  thei a ni. In thlalak hmangin nangmahni leh Mizoram tan hna ropui tak inthawh theuh theih nan MPS leh PCOM member te in hmalam hun kal zelna turah duhsakna ka hlan a che u, a ti.
185th World Photography Day lawmna programme hi Pu Zoramchhana,President MPS chuan kaihhruaiin Pu H. Lalchhanhima,Gen Secy, MPS in report a pe a. World Photography Day pual hian thlalak inelna buatsaih a ni a. Photographers 97 ten thlalak 468 an thehlut a ni. Heta a tha zual 100-te hi Exhibition gallery-a phochhuah an ni.Thalak te hi Category 3: One Earth,Colour leh Monochrome-ah thenin, Category tinah lawmman  1-na atangin 3rd thleng leh consolation  prize mi 5 hnenah pek theuh an ni bawk. Competition a lawmman dawngtu te chu:

One Earth Category-ah:

1st-- Lalhlunmawia Hauchhum

2nd--Lalrinnungi

3rd--R. Lalnunchhana

Colour Category-ah:

1st--Lalnunthara

2nd--K.Lalhmangaihzuala

3rd-- Laltanpuia Ngente

Monochrome Category-ah:

1st---Jephtha Lalrammuana

2nd--PC Malsawmzuala

3rd--Isak Roluahpuia te an ni.

Lawmman dawngtu te hnenah hian Trophy+Certificate+Prize Money pek theuh an ni a. Category tina Consolation prize dawngtute hnenah Certificate+Prize money pek theuh an ni bawk.

Vawiin programme-ah hian I&PR Deparment hnuaia Photography Nodal officer Pu Pratap Chhetri,Deputy Director pawhin thu sawin, Photographer te chu  chhiat ni-that ni thlalak piah lamah Photo Journalism lamah te inhmanga, an talent te  Mizoram tan hmang tangkaia, khawvel pawn lama Mizoram a mawi zawnga  pholangtu  Ambassador nih tum theuh  turin a sawm hlawm a ni.

Chawhnu-ah Thlalamite tan workshop buatsaih a ni a, Pu Malsawmtluanga Vangchhia leh Pi Laldintluangi Tochhawng ten resource person niin, zirtirna an pe.

World Photography Day-2024 pual hian 19th-21st August,2024 chhung hian Photo Exhibition-cum-Sale bakah Photo gear (Thlalamite tana tangkai tur Camera bungrua, Computer, printing hmanraw hrang hrang) discount rate a hralhchhuah a ni bawk ang.