1647/2024-2025

Khawzawl, dated 19th August, 2024: Vawiin chhun dar 1:00 pm khan DC Meeting Hall-ah Khawzawl Deputy Commissioner, Pu K. Vanlalthiana hovin LPG cylinder home delivery chungchang sawrkarin thupek a chhuah anga kalpui theih dan tur rel hovin meeting neih a ni.

He hunah hian member ten sawrkar thuchhuah anga home delivery kalpui a hun tawh viau an tih thu an sawi a, mi tam zawkin an hriat zau theih nana awareness siam a ngaih thu an sawi. Mihring indaih loh te, LPG cylinder stock indaih loh te, pek hun duh dan inang lo te leh harsatna dang sut kian dan tur an rel ho bawk a, chutiang sut kian chhung leh hmalakna zo fel turin September ni 18, 2024 hi hun tawpah an rel fel. DC Pu K. Vanlalthiana chuan an hun hlu tak senga mipuite hamthatna ngai pawimawh a meeting lo tel te hnenah lawmthu a sawi a, home delivery duan anga a hlawhtlin ngei theih nan gas agency te leh khawtlang hruaitute inlungrual taka thawk ho turin a chah bawk a ni.

He hunah hian Mizoram Consumer Union, Khawzawl District lama hotute, FCS&CA Department aiawh leh gas agency aiawh te an tel a ni.