1228/2023-2024

Dated Aizawl, the 21st July, 2023: Zanin khan 2nd North East Cricket Development Committee (NECDC) Achiever's Nite chu Cricket Association of Mizoram huaihawtin Aijal Club ah buatsaih a ni a. Pu Zoramthanga, Chief Minister chu khuallian a ni.

Thusawiin Chief Minister chuan, Islamabad a kan awm laiin Cricket hi kan lo khel ve tawh a, kum tam tak hnuah vawiinah Cricket zara Northeast state hrang hrangte kan inhmukhawm hi a ropuiin a hlu ka ti hle a ni. Mizote tan Cricket hi infiamna thar lam tak a la nihna chen a awm a, amaherawh chu tun hnaiah hmasawnna tam tak kan nei chhova, Suaka Cricket Ground te pawh changtlung takin kan nei ve ta. Cricket infiamna hi India ramah a lian hle tih kan hre veka he infiamna ropui tak huangah hian keini North East states te pawhin hma kan sawn ve zel a pawimawh a, hmasawn tura kan tanrual thiam pawh a ngai a ni. Keinin hma kan sawn hian India kan timawi zual tihna a ni a, sang takah kan awm ve thei a ni tih hrereng ang u, tiin kal khawmte a sawm a ni.

He hunah hian Pu Lalrochhuanga Pachuau, President, Cricket Association of Mizoram chuan palaite lawmna thu a sawi a. Pu Mamon Majumdar, Councilor, BCCI leh Pu Nababratta Bhattacharjee, Co-Convener, NECDC leh President, Meghalaya Cricket Association te pawhin thusawina hun a hmang bawk.

2nd NECDC Achiever's Nite ah hian Northeast India huam chhunga age category heng; Under 15, Under 16 leh Under 19 Players tha thlan chhuah mipa leh hmeichhia te hnenah Best Batter, Best Bowler leh Best Wicket Keeper lawmman te hlan a ni a, Men's Under 25, Men Senior leh Senior Women huangah pawh sem niin Special Awards pahnih Emerging Player of the season leh Player of the season (Men's Senior) sem a ni bawk. Lawmman dawngtute zingah hian Mizoram player pahnih Johan Lalbiakkima, Ramhlun Venglai Cricket Club, Under 16 Boys Best Bowler Award dawngtu leh Thelma Laldinthari, Ainawn Veng, Under 19 Women's Best Bowler dawngtute an tel a ni.

2nd NECDC Achiever's Nite rual hian 8th NECDC Conclave neih nghal a ni a, Arunachal Pradesh, Sikkim, Manipur, Meghalaya leh Nagaland Cricket Association aiawhte an rawl tel. Programme hi Pu Hyunilo Anilo Khing, Secretary, Nagaland Cricket Association chuan lawmthu sawiin a khar a ni.