1227/2023-2024

Aizawl, 21^st July 2023: Thalai hmun kilkhawr deuh a awm ten hmasawnna, khawvel pum huapa an neih theihna tur ngaihtuahhona, Y-20 brainstorming session chu vawiin khan Ministry of Youth Affairs and Sports leh Tharthilthlentu - Entrepreneurship & MSME Support (TiLi) te tangkawp chuan TiLi Center, Mission Vengah buatsaihin, he lama mi thiambik te leh college hrang hrang a zirlai thlan chhuah bik te nen hun an hmang. Labour, Employment, Skill Development and Enterpreneurship (LESDE) Department Secretary Pu Lalramsanga Sailo chuan khuallian niin he hun hi a hmanpui.

TiLi Secretary, Pu Christopher Lalbiaknia chuan inlawmna thu sawiin , Ministry of Youth Affairs & Sports, Govt. of India chuan India ramin G-20 Presidency a chelh chhunga India ram hmun hrang hranga Youth-20 programme a hman chhoh mek chu Mizoramah hman a ni ve dawn a. G-20 Secretariat lamin phalna an pek tawh angin heng programme te hi thalaite leh zirlaite hnenah Mizoram leh hnam tana hmasawnna thil pawimawh tak tak inzirtirna hun atan Tharthilthlentu hian buatsaihin hma an la a ni, a ti a. Industry 4.0 chungchang te sawi zauin, Mizo thlalai ten Industry 4.0 kan hman tangkai theih zia a sawi bawk.

Khuallian Pu Lalramsanga Sailo, LESDE Secretary chuan thupui sawi hawnna hun hmangin, ram hma hun en leh en loh chu thalaite kutah a innghah thu a sawi a. Mizoram chu a la naupan ang huin, thiamna leh theihna kan nei tha tawh hle a ni, a ti a. Industry 4.0 hi ram changkang tawh te tan pawh a hman tangkai a harsat thu sawiin, chutih mek lai chuan Mizoram, ram kilkhawr atanga hman tangkai dan kan hria chu lawmawm a tih thu a sawi bawk. Sawrkarin ‘one stop solution’, sawrkar website hrang hrang a neih te tarlangin khuallian chuan, heng website hnuaia sawrkar hna leh scheme tam tak awmah Mizo thalai nuai hnih chuang an in register tawh a ni, a ti a. Y-20 Brainstorming Session chuan Mizoram thalaite tan hmasawnna a thlen ngei a beisei thu a sawi bawk a ni.

Pu Ali Syed, Consultant, Research and Information System (RIS) - Ministry of External Affairs (MEA) pawhin thu sawina hun hmangin, MEA kaihhruaina hnuaiah India ram hmun hrang hrangah hun an hman tawh thu a sawi a, he brainstorming session hian Mizo thalai te tan thil tha hringchhuak ngei se a duh thu a sawi bawk.

Brainstorming session hi Pu LTL Fela, TiLi CEO leh Chairman ni bawk chuan kaihruai a. He hunah hian Keynote speaker pathum an awm a, chung te chu - Pi Rokimi Khawlhring, Ex – Equity Research Assistant; Laldinkima Sailo, International Affairs & Public Policy Advisor; Pu Danny Hmar, IIMA, Browserstack te an ni.

Pu Laldinkima Sailo hian inzirtirna hun hmang hmasa berin, hmasawnna leh hlawhtlinna hi ramchangkang leh laili a cheng te tan chauh anih loh thu a sawi a. Pi Rokimi Khawlhring pawhin mizo thalai ten entrepreneurship leh corporate hna kan la hriatthiam tawk loh zia te leh he lamah hian hna leh hmasawnna tam zia te a sawi zau bawk a. Pu Danny Hmar pawhin Mizo thalai ten hmasawn tura kan tih hmasak ber tur chu kan ngaihdan thlak a ni a ti a. Khawvel hmasawn zela technology thar lo chhuak thar tam tak te sawi zau in, thalaite chu heng technology te hi tha taka hmang tangkai turin a fuih a ni.

Hun tawp lamah hian zirlai kalkhawmte leh Keynote speaker-te hian inkawmkhawmna hun neiin, zawhna leh chhanna hun bakah ngaihdan sawihona hun hlawkthlak leh hlimawm tak hman ho a ni a. Pi Martha Lalzarmawii, TiLi Executive Member in lawmthu sawina hun hmangin, he brainstorming session hi khar a ni.