1229/2023-2024

Aizawl, 22nd July, 2023 : Tukin khan DIPR Minister Pu Lalruatkima chuan a bial chhung Vaivakawn venga leimin vanga chhungkaw thenkhatte harsatna tawh a enfiah.

Pu Lalruatkima hi AMC, DM&R, Aizawl DC, Zonal, PWD, Geology & Mining leh DIPR official ten an tawiawm a. Vaivakawn Local Council leh YMA hruaitute bakah khawtlang mi pawimawh ten lo dawngsawngin hmalak dan tur an sawiho a ni.

Vaivakawn leimin avang hian Vaivakawn Zohnuai chuan hnuaia veng chhung inkalpawhna a chhiat vek avangin leiminna atanga hmar lama cheng chhungkaw 20 velin kawngpui pawhtu chakkhai lakna tur leh veivahna tur kawng mumal an neih loh avangin harsatna an tawk nasa hle a, Minister ho hian helai hmuna cheng ten kawngpui awlsam taka an pawh theihna tur kawng awm thei te dapin NH-6/306 (Hunthar - Vaivakawn, Sairang Road) lam atanga kawng siam dan turte pawh a hmunah kalin an en a. A kham ko a san avangin thutlukna siam nghal mai a harsa an tih bakah PWD (Highways) hotute nen a rang thei ang bera thutkhawma ruahmanna siam dan tur ngaihtuah ho nise tiin thu an thlah a ni.

Vaivakawn Zohnuai (Ropaiabawk Peng) Vaivakawn thlanmual bul hi June ni 16, 2023 zingkar khan nasa taka minin a thlang kawngpui NH 6/306 chu hun engemaw chen a dang ping a, chhungkaw 16 in an chenna in luah ngam lovin an chhuahsan tawh a ni.

Aizawl Municipal Corporation (AMC) pawhin July ni 11, 2023 khan thupek chhuahin Vaivakawn Zohnuai lei minna leh lei khikna chhehvel-a in sa mek leh la sa tur reng reng ten khawl (heavy Machinery) leh nghawr siam thei hman a khap a ni.