1230/2023-2024

Aizawl, 22.07.2023 : Social Welfare Minister Er. Lalrinawma chuan vawiin khan Khawbel Students' Union-te'n an pawl din champha puala 'Thisen pek runpui' Aizawl Civil Hospital-a an buatsaih chu a tel pui.

Minister Er. Lalrinawma chuan zirlai rualte'n midang tan malsawmna ni thei tura an thisen thianghlim leh hlu tak a duh leh mamawh tana an pe thei chu lawmawm a ti a. Hetianga midangte chhanhim thei tura ding tur chuan hriselna leh nun uluk a invawn a pawimawh tel avangin thalaite chu ruihhlo laka fihlim turin leh mipat hmeichhiatna laka invawng thianghlim turin a chak bawk. Minister chuan a bial chhung Khawbel zirlaite chu an hun hman zel turah duhsakna hlanin, ram nghahfak an nih hre rengin an zirlaiah theihtawp chhuah turin a chah bawk a ni.

Khawbel Students' Union Aizawl hi Kum 1993 khan din niin kum 2016 atang khan kumtin an pawl din chamah hian midang tan thisen an pe ṭhin a, kumin hi vawi 8 an pekna a ni tawh a ni. KSU hian thingphun leh Education Awarness leh zirlai harsatna tawkte an pui thin a. Student Union President Joseph Lalthazuala leh hruaitu dangte leh Khawbel Welfare Chairman Pu Lalremtluanga te pawhin vawiin thisen pek programme hi telpuiin Dr. K. Rothangpuia, HOD Civil Hospital in kaihruaina hun a hmang a ni.