1231/2023-2024

Aizawl, the 22^nd July 2023 : Vawiin khan Home Commissioner Pu H. Lalengmawia, IAS chuan a Office Chamber-ah Peace Accord MNF Returnees (PAMRA) leh Mizo Students’ Union (MSU) hruaitute, tunhnaia an Press Release theuh chhuah chungchang sawipuiin meeting a neihpui a. Meeting ah hian Home Department leh Mizoram Police senior officer engemaw zat an tel a ni.

Meeting hi Commissioner & Secretary, Home Department-in a kaihruaiin hun chep tak kara PAMRA leh MSU hruaituten meeting kohna ngaipawimawha an rawn tel theih avangin lawmthu a hrilh a. Inkoh khawm chhan te sawifiahin leh tun thlenga Manipur tualchhung buainaa Mizoram Sawrkar hmalakna hrang hrang te a sawi zau a. Hemi hnuin PAMRA hriatute hnen atangin an pawl hmalak chhan te ngaithlak a ni. Hemi hnu hian a nghawng theih turte uluk taka sawi ho a nih hnuah a hnuai ami ang hian thuthlukna siam a ni.

PAMRA-in ni 21.7.2023-a thu chhuah an siamah an sahimna atana Mizoram atanga inthiar filhlim tura Meitei-te an tih chu Sawrkar-in hmalakna a neih zui chhoh tak avangin PAMRA hruaitute chuan an thu chhuah hi Mizoram Sawrkar ngenna zahawm tak avang leh Mizo mipuite tana tha zawk tur a nih dawn chuan an thu chhuah hi bawhzui zel loh tha an ti. He an thu chhuah hi Mizorama Meitei-te tihraltitna tur emaw, Mizoram atanga hnawhchhuah lam emaw a kawk lo tih fiah takin meeting hi an hriattir bawk. Rilru tha takin, Mizorama Meitei awmte sahim zawk nana thu chhuah hi siam an ni tih meeting an hriattir a ni. Hetih lai hian state pawn chanchinbu thenkhata ‘Quit Mizoram Order’ ang hiala thu an chhuah hi chu PAMRA hian pawi an tih thu an sawi.

Hemi hnu hian meeting ah hian PAMRA hruaitute leh All Mizoram Manipuri Association hruaitute chu Home Commissioner Office ah inkawm lehin, PAMRA ten an thuchhuah chu rilru tha lo emaw, an mahni tiralti zawng emaw avang a tichhuak nilovin an sahimna ngaituah leh boruak tha lo awm thei ven nana an siam a nih thu an hrilhfiah a. Home Commissioner pawhin All Mizoram Manipuri Association hruaitute chu an mi leh sate thlamuang taka Mizoram awm tura hrilh turin leh thu lengvak avangin Mizoram chhuahsan lo turin a ngen bawk a ni.